રાજ્યમાં અત્યારે મિશ્ર વાતાવરણ જોવા મળી રહ્યું છે. હવામાન વિભાગના ડાયરેક્ટર ડો. એ.કે.દાસના જણાવ્યા અનુસાર આગામી 7 દિવસ વાતાવરણ સૂકું રહેશે. પવનની દિશા બદલાઈને પૂર્વ તરફના પવન ફૂંકાશે. આગામી 5 દિવસ તાપમાન યથાવત રહેશે. 5 દિવસ બાદ 2થી 3 ડિગ્રી તાપમાન વધી જશે. એટલે કે લઘુત્તમ તાપમાનમાં વધારો થશે જેથી ઠંડી ઘટશે, પરંતુ વેસ્ટર્ન ડિસ્ટર્બન્સના કારણે વાદળછાયુ વાતાવરણ રહે જેના કારણે ઠંડી અનુભવાશે.
અમદાવાદમાં તાપમાનનો પારો 14 ડિગ્રીએ પહોંચ્યો તાપમાનની વાત કરીએ તો, નલિયામાં સૌથી વધુ ઠંડી સાથે 9.8 ડિગ્રી સેલ્સિયસ લઘુત્તમ તાપમાન નોંધાયું હતું. જે અગાઉ 8.8 ડિગ્રી સેલ્સિયસ હતું, જેમાં 1 ડિગ્રી સેલ્સિયસનો વધારો થઈને સૌથી ઠંડુ શહેર નલિયા રહ્યું હતું. જ્યારે અમદાવાદમાં 1 ડિગ્રી સેલ્સિયસના વધારા સાથે 14 ડિગ્રી સેલ્સિયસ લઘુત્તમ તાપમાન નોંધાયું હતું.
અન્ય શહેરોમાં કેટલું તાપમાન નોંધાયું વડોદરામાં 12.2 ડિગ્રી, ભાવનગરમાં 14.8 ડિગ્રી, ભુજમાં 14.4 ડિગ્રી, દમણમાં 15 ડિગ્રી, ડીસામાં 13.3 ડિગ્રી, દીવમાં 13.3 ડિગ્રી, દ્વારકામાં 17.6 ડિગ્રી, કંડલામાં 15.3 ડિગ્રી, નલિયામાં 9.8 ડિગ્રી, ઓખામાં 21.6 ડિગ્રી, પોરબંદરમાં 13.4 ડિગ્રી, રાજકોટમાં 12.8 ડિગ્રી, સુરતમાં 13.8 ડિગ્રી, અને વેરાવળમાં 17.3 ડિગ્રી લઘુત્તમ તાપમાન નોંધાયું હતું.