આણંદ મહાનગરપાલિકાના એસ્ટેટ વિભાગે આજે મહત્વપૂર્ણ કાર્યવાહી કરી છે. સ્ટેશન રોડ અને વિદ્યાનગર રોડ પર ગેરકાયદે રીતે ઊભા રહેતા લારી-ગલ્લા સામે કડક પગલાં લેવામાં આવ્યા છે.
સ્ટેશન રોડ પર મોટી શાકમાર્કેટ પાસે ફળ વેચનારા લારીધારકો દ્વારા જાહેર રસ્તા પર અતિક્રમણ કરવામાં આવતું હતું.
આ અતિક્રમણથી લોકોને મુશ્કેલી પડતી હતી અને ટ્રાફિકની સમસ્યા સર્જાતી હતી. એસ્ટેટ વિભાગની ટીમે અચાનક ચેકિંગ હાથ ધર્યું અને આવી લારીઓને જપ્ત કરી.
વિદ્યાનગર રોડ પર એપીસી સર્કલ નજીક ખાઉધરી ગલી વિસ્તારમાં પણ લારી-ગલ્લા અને ખુરશીઓ રાહદારીઓ માટે અવરોધરૂપ બની રહ્યા હતા. આ તમામ સામગ્રી પણ એસ્ટેટ વિભાગે જપ્ત કરી લીધી છે.
મહાનગરપાલિકાએ સ્પષ્ટ કર્યું છે કે જપ્ત કરાયેલા લારી-ગલ્લા માટે દંડની કાર્યવાહી કરવામાં આવશે. વેપારીઓને ચેતવણી આપવામાં આવી છે કે જાહેર રસ્તા પર અવરોધ ઊભો કરનારા અને ટ્રાફિકની સમસ્યા સર્જનારા સામે કાયદાકીય પગલાં લેવામાં આવશે. મહાનગરપાલિકા આવી કાર્યવાહી નિયમિત રીતે કરશે તેવી સ્પષ્ટતા કરવામાં આવી છે.
