જૂનાગઢના અક્ષરવાડી વિસ્તારમાં આવેલા BAPS સ્વામિનારાયણ મંદિરમાં ૧૯મો પાટોત્સવ ભવ્ય રીતે ઉજવાયો. સવારે ૬ વાગ્યે બ્રાહ્મમુહૂર્તે પાટોત્સવની મુખ્ય ધાર્મિક વિધિનો પ્રારંભ થયો.
ગર્ભગૃહમાં અક્ષરપુરુષોત્તમ મહારાજ, રાધારમણ ભગવાન અને સ્વામિનારાયણ ભગવાનની મૂર્તિઓનો વેદમંત્રોચ્ચાર સાથે પંચામૃત અને શુદ્ધ જળથી અભિષેક કરાયો. ભક્તો માટે નિજ ખંડમાં રાખેલી ચલ મૂર્તિનો અભિષેક કરવાનો અવસર પણ આપવામાં આવ્યો.
વિધિ બાદ ભવ્ય અન્નકૂટ ધરાવવામાં આવ્યો અને મહાઆરતી યોજાઈ. કાર્યક્રમમાં ગોંડલના દિવ્યપુરુષ સ્વામી, રાજકોટના પૂજ્ય બ્રહ્મતીર્થ સ્વામી સહિત જામનગર, ધારી, લીંબડી અને સુરેન્દ્રનગરના BAPS મંદિરોના કોઠારીઓ અને સંતો ઉપસ્થિત રહ્યા.
સાંજે ગુણાતીત સભામંડપમાં મહાપૂજા બાદ ધૂન-કીર્તન અને કથા કાર્યક્રમ યોજાયો. સારંગપુરથી પધારેલા પૂજ્ય જ્ઞાનનયન સ્વામીએ પાટોત્સવનો મહિમા સમજાવ્યો. ગઢડા મંદિરના અધ્યાત્મ સ્વરૂપ સ્વામીએ સત્સંગનો લાભ આપ્યો.
શહેર અને આસપાસના વિસ્તારોમાંથી હજારો હરિભક્તોએ આ પાટોત્સવમાં ભાગ લીધો. સમગ્ર કાર્યક્રમ દરમિયાન શિસ્તબદ્ધ વ્યવસ્થા અને ભક્તોની શ્રદ્ધાભાવના જોવા મળી.