લખપત તાલુકાના રણ સરહદ નજીક આવેલા ગુનેરી ગામ પાસે નિત્ય શિવ નિરંજનદેવ ગુફા ખાતે બુધવારથી શ્રીમદ ભાગવત કથાનો પ્રારંભ થયો છે. આ ગુફાનું નિર્માણ બ્રહ્મલીન પુ. ઉદયનંદગીરી મહારાજે ડુંગર કોતરીને કર્યું હતું.
રાષ્ટ્રીય મહાકાલ સેનાના સંસ્થાપક દિગંબર ખુશાલ ભારતી બાપુના સાનિધ્યમાં કચ્છમાં પ્રથમ વખત હિંદુ સનાતની ચાતુર્માસની ઉજવણી થઈ રહી છે. ગુનેરી ગામથી ગુફા સુધી દોઢ કિલોમીટર લાંબી પોથી યાત્રા નીકળી હતી.
કથાના પ્રારંભે પૂજ્ય ભાઈશ્રી રમેશભાઈ ઓઝાના શિષ્ય હાર્દિકભાઈ જોષીએ મંગલાચરણ કર્યું હતું. તેમણે કચ્છને દૈવી ભૂમિ ગણાવી હતી. આ વિસ્તારમાં કોટેશ્વર મહાદેવ અને આશાપુરા માતાજી બિરાજમાન છે.
ચાતુર્માસ દરમિયાન ત્રણ કથાઓ યોજાશે, જેમાં આ પ્રથમ કથા છે. કાર્યક્રમમાં ગુનેરી ગુફાના મહંત અશોકભારતી બાપુ સહિત અનેક સંતો ઉપસ્થિત રહ્યા હતા. ગુનેરી, ઉમરસર, સિયોત, અટડા, મુધાન, પાનધ્રો સહિત અનેક વિસ્તારોમાંથી ભક્તો આવ્યા હતા. આ આયોજનની વ્યવસ્થા નિત્ય શિવ નિરંજનદેવ ગુફા સેવક સમિતિ સંભાળી રહી છે.