મંગળવારે સવારે મ્યાનમારમાં ૪.૭ ની તીવ્રતાનો ભૂકંપ આવ્યો હતો, જેના કારણે આસામ, મણિપુર અને નાગાલેન્ડ સહિત ભારતના અનેક ઉત્તરપૂર્વીય રાજ્યોમાં ભૂકંપના આંચકા અનુભવાયા હતા. નેશનલ સેન્ટર ફોર સિસ્મોલોજી (NCS) અનુસાર, ભૂકંપ સવારે ૬.૧૦ વાગ્યે ભારત-મ્યાનમાર સરહદની નજીક – મણિપુરમાં ઉખરુલથી માત્ર ૨૭ કિમી દક્ષિણપૂર્વમાં આવ્યો હતો. NCS એ અહેવાલ આપ્યો છે કે ભૂકંપ ૧૫ કિમીની ઊંડાઈએ ઉદ્ભવ્યો હતો. ચોક્કસ કોઓર્ડિનેટ્સ ૨૪.૭૩ દ્ગ અક્ષાંશ અને ૯૪.૬૩ ઈ રેખાંશ પર ચિહ્નિત કરવામાં આવ્યા હતા.
મીડિયા સુત્રો મુજબ, ભૂકંપનું સ્થાન નોંધપાત્ર હતું કારણ કે તે નાગાલેન્ડમાં વોખાથી માત્ર ૧૫૫ કિમી દક્ષિણ-દક્ષિણપૂર્વમાં, દિમાપુરથી ૧૫૯ કિમી દક્ષિણપૂર્વમાં અને મોકોકચુંગથી ૧૭૭ કિમી દક્ષિણમાં હતો. તે મિઝોરમમાં ન્ગોપાના ૧૭૧ કિમી ઉત્તરપૂર્વમાં અને ચંફાઇથી ૧૯૩ કિમી ઉત્તરપૂર્વમાં પણ નોંધાયું હતું, જેના કારણે તે સમગ્ર પ્રદેશમાં વ્યાપકપણે અનુભવાયો હતો.
તાત્કાલિક નુકસાનના કોઈ અહેવાલ નથી
જ્યારે પૂર્વોત્તરના કેટલાક ભાગોમાં ભૂકંપના આંચકાથી રહેવાસીઓમાં ગભરાટ ફેલાયો હતો, ત્યારે મોટા નુકસાન કે જાનહાનિના કોઈ તાત્કાલિક અહેવાલ નથી. દરમિયાન, અધિકારીઓ પરિસ્થિતિ પર નજીકથી નજર રાખી રહ્યા છે. અગાઉ ૨૧ સપ્ટેમ્બરના રોજ, બાંગ્લાદેશમાં ૪ ની તીવ્રતાનો ભૂકંપ આવ્યા બાદ મેઘાલયમાં ભૂકંપના આંચકા અનુભવાયા હતા. અધિકારીઓએ જણાવ્યું હતું કે ભારતીય સમય મુજબ સવારે ૧૧.૪૯ વાગ્યે મેઘાલયની બાંગ્લાદેશ સાથેની સરહદ નજીક ભૂકંપ આવ્યો હતો. મેઘાલયમાં કોઈ નુકસાન કે જાનહાનિના કોઈ અહેવાલ નથી, તેમણે ઉમેર્યું હતું.
આ પ્રદેશમાં તાજેતરની ભૂકંપીય પ્રવૃત્તિ
આ તાજેતરનો ભૂકંપ ૧૪ સપ્ટેમ્બરના રોજ મ્યાનમારમાં ૪.૬ ની તીવ્રતાના બીજા ભૂકંપ પછી આવ્યો છે. બંને આંચકા દેશની ભૂકંપીય પ્રવૃત્તિ પ્રત્યે સતત સંવેદનશીલતાને પ્રકાશિત કરે છે. મ્યાનમાર ચાર ટેક્ટોનિક પ્લેટો – ભારતીય, યુરેશિયન, સુંડા અને બર્મા પ્લેટોના આંતરછેદ પર આવેલું છે – જે તેને વારંવાર ભૂકંપ આવવાની સંભાવના આપે છે.
ઉચ્ચ ભૂકંપ જાેખમ ઝોન
મ્યાનમારનો સાગાઈંગ ફોલ્ટ, જે ૧,૪૦૦ કિલોમીટરનો ટ્રાન્સફોર્મ ફોલ્ટ છે, તે સાગાઈંગ, મંડલે, બાગો અને યાંગોન સહિતના પ્રદેશો માટે જાેખમ વધારે છે, જે દેશની લગભગ અડધી વસ્તી ધરાવે છે. યાંગોન ફોલ્ટ લાઇનથી પ્રમાણમાં દૂર હોવા છતાં, તેની ગીચ વસ્તી તેને ખાસ કરીને સંવેદનશીલ બનાવે છે. ઐતિહાસિક રેકોર્ડ દર્શાવે છે કે ૧૯૦૩ ના બાગો ભૂકંપ (તીવ્રતા ૭.૦) જેવા દૂરના ભૂકંપોએ પણ યાંગોનમાં નોંધપાત્ર નુકસાન પહોંચાડ્યું હતું.