કર્ણાટકના નાયબ મુખ્યમંત્રી ડી કે શિવકુમારે મંગળવારે કન્નડ કાર્યકર્તાઓને સુપ્રીમ કોર્ટના આદેશનું પાલન કરવાની અપીલ કરી હતી, જેમાં રાજ્ય સરકારને કમલ હાસન અભિનીત ફિલ્મ ‘ઠગ લાઈફ‘નું પ્રદર્શન સુનિશ્ચિત કરવાનો નિર્દેશ આપવામાં આવ્યો હતો.
૭૦ વર્ષીય અભિનેતાની કન્નડ ભાષા વિશેની ટિપ્પણીએ મોટો વિવાદ ઉભો કર્યા બાદ કન્નડ કાર્યકરો ફિલ્મના પ્રદર્શન સામે ઉગ્ર વિરોધ કરી રહ્યા છે. તેમણે વિરોધ પ્રદર્શનો કર્યા, પોલીસ ફરિયાદ નોંધાવી અને ફિલ્મ થિયેટરોને ફિલ્મ પ્રદર્શિત ન કરવાની ચેતવણી આપી, આરોપ લગાવ્યો કે કમલ હાસને કન્નડ ભાષાના સમૃદ્ધ ઇતિહાસને જાણ્યા વિના તેનું અપમાન કર્યું છે.
રાજ્યના થિયેટરોમાં ‘ઠગ લાઈફ‘ પ્રદર્શિત ન થયા બાદ સુપ્રીમ કોર્ટે મંગળવારે કર્ણાટક સરકારની આકરી ઝાટકણી કાઢી.
કોર્ટે કહ્યું કે ટોળા અને સુરક્ષાબળોને રસ્તાઓ પર કબજાે કરવાની મંજૂરી આપી શકાય નહીં.
કોર્ટના આદેશ પર પ્રતિક્રિયા આપતા શિવકુમારે કહ્યું, “આપણે સુપ્રીમ કોર્ટના આદેશનું સન્માન સાથે પાલન કરવું પડશે. દરેકની મર્યાદાઓ હોય છે. હું વિવિધ સંગઠનોને અપીલ કરું છું કે આપણે આપણી મર્યાદાઓ રાખવી જાેઈએ.”
“હું બધા કન્નડ કાર્યકર્તાઓને અપીલ કરું છું, કૃપા કરીને શાંત રહો, આપણે કોર્ટનો આદર કરવો જાેઈએ. કોઈએ કાયદો હાથમાં ન લેવો જાેઈએ,” તેમણે કહ્યું.
સાથેજ નાયબ મુખ્યમંત્રીએ ભારપૂર્વક જણાવ્યું કે કર્ણાટક હંમેશા શાંતિપ્રિય રાજ્ય રહ્યું છે.
અભિપ્રાય વ્યક્ત કરવામાં કંઈ ખોટું નથી તે નોંધીને, શિવકુમારે કહ્યું કે રાજ્ય સરકારે પણ કાર્યકરોને તેમના વિચારો વ્યક્ત કરવાની તક આપી છે. તેમણે બેંગલુરુના લોકોને ઉદાર બનવા અપીલ કરી.
“અમે બેંગલુરુમાં બધી જાતિઓ, ભાષાઓ અને સંસ્કૃતિને સમાવી છે. આ એક આંતરરાષ્ટ્રીય શહેર છે. કર્ણાટકના લોકો હંમેશા મોટા હૃદયના રહ્યા છે,” તેમણે ભારપૂર્વક જણાવ્યું. તેમણે એ પણ નિર્દેશ કર્યો કે કોઈ કન્નડના આત્મસન્માનને બગાડી શકે નહીં અને રાજ્ય સરકાર પણ તેના પક્ષમાં છે પરંતુ કોર્ટનું સન્માન કરવું પડશે. ‘ઠગ લાઈફ‘ ૫ જૂને દેશભરના સિનેમા હોલમાં રિલીઝ થઈ.