જીલ્લાના માંગરોળ પંથકમાં છેલ્લા ૨૪ કલાક દરમિયાન આભ ફાટવા જેવી સ્થિતિ સર્જાતા સમગ્ર જનજીવન ભારે ખોરવાયું છે. ધોધમાર વરસાદને લીધે સોમનાથ-પોરબંદર હાઈવે પર મોટા પાયે ધોવાણ થયું છે. હુસેનાબાદ આગળ નેશનલ હાઈવેનું અંદાજે ૪૦ ફૂટ જેટલું ધોવાણ થઈ જતાં વાહનવ્યવહાર સંપૂર્ણપણે ઠપ થઈ ગયો છે. ઘટનાની ગંભીરતાને ધ્યાને રાખીને રાતથી જ આ રસ્તો બંધ કરી દેવામાં આવ્યો છે અને તંત્ર દ્વારા તાત્કાલિક ધોરણે કામગીરી શરૂ કરી દેવાઈ છે.
તો બીજી તરફ, આ દુર્ઘટનાને પગલે સ્થાનિક લોકો દ્વારા તંત્ર સામે ગંભીર આક્ષેપો કરવામાં આવી રહ્યા છે. સ્થાનિકોનો આરોપ છે કે, બ્રિજ પર નવી બનેલી પાળીને લીધે જ આ મોટી સમસ્યા સર્જાઈ છે. અગાઉ જૂના બ્રિજ પર જાળીઓ લગાવવામાં આવી હતી, જેના કારણે વરસાદનું પાણી ખૂબ જ સરળતાથી નીકળી જતું હતું.
જાે કે, હાલમાં બનાવેલી પાળીના લીધે વરસાદી પાણીનો યોગ્ય નિકાલ થઈ શક્યો નથી અને પાણીનું દબાણ વધતાં હાઈવે ધોવાઈ ગયો છે. આ મુશ્કેલીને જાેતાં સ્થાનિકો દ્વારા એવી માંગ કરવામાં આવી રહી છે કે, અગાઉ જે પ્રકારે વ્યવસ્થા હતી તે જ પ્રકારે બ્રિજ પર ફરીથી જાળી લગાવવામાં આવે.