રાજકોટ: નવરાત્રીના પાવન પર્વ નિમિત્તે ઉપલેટાના કોટેશ્વર ગ્રુપ દ્વારા આયોજિત દરબારગઢ ગરબી મંડળમાં માતાજીની આરાધના અને ઉત્સવની ભારે ધામધૂમથી ઉજવણી કરવામાં આવી રહી છે. આ ગરબી મંડળ છેલ્લા ૧૦૦ વર્ષથી પણ વધારે સમય એટલે કે આશરે સવા સો વર્ષથી સતત અને અવિરતપણે ચાલી રહ્યું છે. અહીં જૂના જમાનાથી ચાલી આવતી પ્રાચીન પરંપરાને આજે પણ જાળવી રાખવામાં આવી છે. આ પરંપરા મુજબ નાની બાળાઓ અહીં રાસ રમે છે, માતાજીની આરાધના કરે છે અને લાણી લઈને ખૂબ જ રાજીખુશીથી પોતાના ઘરે જાય છે.
આ ગરબી મંડળની એક ખાસ વિશેષતા એ છે કે અહીં સામાજિક સમરસતા અને કોમી એકતાના દર્શન થાય છે. આયોજકો દ્વારા હિન્દુ અને મુસલમાન એમ બંને સમાજની છોકરીઓને કોઈપણ પ્રકારના ભેદભાવ વગર ગરબીમાં રાખવામાં આવે છે. આ ઉપરાંત, આ ગરબીમાં સામેલ થતી તમામ બાળાઓ કોઈપણ પ્રકારની પ્રેક્ટિસ વગર જ સીધી ગરબે રમે છે.
નાના બાળકો માટેની આ ગરબીને ‘ભૂલકા ગરબી’ કહેવામાં આવે છે, જેમાં માત્ર ૫ થી ૧૧ વર્ષની બાળાઓને જ ગરબે રમવા માટે રાખવામાં આવે છે. સંખ્યાની દ્રષ્ટિએ જોઈએ તો, ગત વર્ષે આ ગરબીમાં પોણા ત્રણસો જેટલી બાળાઓ હતી, જ્યારે આ વર્ષે પણ સવા બસો જેટલી બાળાઓ ઉત્સાહભેર ગરબે રમી રહી છે. કોટેશ્વર ગ્રુપના તમામ સભ્યો સાથે હળીમળીને આ સમગ્ર નવરાત્રી ઉત્સવને ખૂબ જ ધામધૂમથી ઉજવે છે.