કેનેડાએ ભારતીય ફાર્મા કંપનીના ડાયાબિટીસ વિરોધી દવા ઓઝેમ્પિકના જેનેરિક સંસ્કરણને દેશમાં ઉપયોગ માટે મંજૂરી આપી છે.
હેલ્થ કેનેડાએ એક મહત્વની જાહેરાત કરી હતી કે હૈદરાબાદ સ્થિત ડૉ. રેડ્ડીઝ લેબોરેટરીઝમાંથી જેનેરિક સેમાગ્લુટાઇડ ઇન્જેક્શનને મંજૂરી આપવામાં આવી છે. ડૉ. રેડ્ડીઝ લેબોરેટરીઝ દ્વારા મંજૂરી માટે અરજી જાન્યુઆરી ૨૦૨૪ માં દાખલ કરવામાં આવી હતી.
લોકપ્રિય દવાના ઇન્જેક્શનનો ઉપયોગ ટાઇપ ૨ ડાયાબિટીસને નિયંત્રિત કરવા માટે થાય છે અને તે વજન ઘટાડવાના એજન્ટ તરીકે પણ અસરકારક હોવાનું જાણવા મળ્યું છે.
એક પ્રકાશનમાં, હેલ્થ કેનેડાએ જણાવ્યું હતું કે આ મંજૂરી દેશ માટે પ્રથમ જ નથી, પરંતુ તે “ય્૭ માં મંજૂર થનારી પ્રથમ” છે.
હેલ્થ કેનેડાએ જણાવ્યું હતું કે તે હાલમાં વિવિધ કંપનીઓના આઠ અન્ય સબમિશનની સમીક્ષા કરી રહ્યું છે.
વિભાગે જણાવ્યું હતું કે તેણે “કંપની દ્વારા પૂરા પાડવામાં આવેલા પુરાવાઓની સંપૂર્ણ સમીક્ષા કર્યા પછી, દર્શાવ્યું હતું કે તે “જેનરિક દવાઓ માટે સલામતી, અસરકારકતા અને ગુણવત્તા માટેના માપદંડો” ને પૂર્ણ કરે છે તે પછી” દવાને અધિકૃત કરી છે.
તેમાં ઉમેર્યું હતું કે હાલના ઉત્પાદનોની જેમ, ડૉ. રેડ્ડીઝ સેમાગ્લુટાઇડ ઇન્જેક્શન, બ્લડ સુગરના સ્તરને નિયંત્રિત કરવા માટે ટાઇપ ૨ ડાયાબિટીસ ધરાવતા પુખ્ત દર્દીઓની અઠવાડિયામાં એક વાર સારવાર માટે સૂચવવામાં આવ્યું હતું.
તેમણે એમ પણ કહ્યું કે કેનેડામાં અધિકૃત બધી દવાઓની જેમ, વિભાગ “બધા જેનરિક સેમાગ્લુટાઇડ ઉત્પાદનોની સલામતી અને અસરકારકતાનું નિરીક્ષણ કરવાનું ચાલુ રાખશે.”
તેમણે નિર્દેશ કર્યો કે કેનેડામાં ઘણી જેનરિક દવાઓ બ્રાન્ડ નામની દવાઓ કરતાં ૪૫ થી ૯૦ ટકા સસ્તી છે.
હેલ્થ કેનેડાએ જણાવ્યું હતું કે સેમાગ્લુટાઇડના જેનરિક સંસ્કરણો જટિલ કૃત્રિમ ઉત્પાદનો હતા જે ફાર્માસ્યુટિકલી બ્રાન્ડ નામની બાયોલોજિક દવાની સમકક્ષ હોય છે અને તેની “સમીક્ષા ખાતરી કરે છે કે આ ઉત્પાદનો વચ્ચેના તફાવતો દવાની સલામતી, અસરકારકતા અથવા ગુણવત્તાને અસર કરતા નથી.”
તેમણે કહ્યું કે જેનરિક દવાઓની ઉપલબ્ધતા કેનેડામાં સકારાત્મક અસર કરે તેવી અપેક્ષા છે, જેમાં દર્દીઓ અને આરોગ્યસંભાળ પ્રણાલી માટે સંભવિત ખર્ચ બચતનો સમાવેશ થાય છે.
ડેનિશ હેલ્થકેર કંપની નોવો નોર્ડિસ્ક દ્વારા બનાવેલ ઓઝેમ્પિક, યુનાઇટેડ સ્ટેટ્સમાં લીલીઝંડી મળ્યાના મહિનાઓ પછી જાન્યુઆરી ૨૦૧૮ માં કેનેડામાં મંજૂર કરવામાં આવી હતી. આ બ્લોકબસ્ટર ફોર્મ્યુલેશન માટેનું તેનું આંતરરાષ્ટ્રીય પેટન્ટ આ વર્ષે માર્ચમાં સમાપ્ત થઈ ગયું.