રશિયન ક્રૂડ (કાચા તેલ)ની ખરીદી પર પ્રતિબંધ મૂકવા માટે યુનાઇટેડ સ્ટેટ્સે એક નવું બિલ પસાર કર્યા પછી, ક્રેમલિને ગુરુવારે ચેતવણી આપી હતી કે આ બિલની અસર યુક્રેન યુદ્ધનો અંત લાવવા માટેની વાટાઘાટો પર પડશે.
પ્રેસ બ્રીફિંગ દરમિયાન પત્રકારો સાથે વાત કરતા, ક્રેમલિનના પ્રવક્તા દિમિત્રી પેસ્કોવે જણાવ્યું હતું કે યુએસ દ્વારા લાદવામાં આવેલા નવા પ્રતિબંધો યુક્રેન માટે કોઈ સમજૂતી સુધી પહોંચવાનું કામ “વધુ મુશ્કેલ” બનાવશે.
પેસ્કોવે કહ્યું, “અમે સ્વાભાવિક રીતે જ આ દસ્તાવેજની પ્રગતિ પર નજર રાખી રહ્યા છીએ. તે ‘મિત્રતાવિહોણા પગલાં‘ની શ્રેણીમાં આવે છે, અને સ્વાભાવિક છે કે યુએસ દ્વારા કોઈપણ વધારાના પ્રતિબંધો લાદવાથી યુક્રેનમાં શાંતિ સમજૂતી શોધવાના પ્રયાસો ચોક્કસપણે જટિલ બનશે.”
ક્રેમલિન તરફથી આ ચેતવણી એવા સમયે આવી છે જ્યારે યુક્રેન અને રશિયા વોશિંગ્ટનની મધ્યસ્થી હેઠળ વાટાઘાટોના નવા રાઉન્ડ માટે તૈયાર થઈ રહ્યા હતા.
ઓક્ટોબરમાં કિવ, વોશિંગ્ટન અને મોસ્કો વચ્ચે નવી ત્રિપક્ષીય વાટાઘાટો યોજાય તેવી અપેક્ષા છે. આ બેઠક સપ્ટેમ્બરમાં યુએસ દૂતો સ્ટીવ વિટકોફ અને જેરેડ કુશનરની કિવ અને મોસ્કોની મુલાકાત બાદ યોજાઈ રહી છે, જે શાંતિ વાટાઘાટોને પુનર્જીવિત કરવાના પ્રયાસનો એક ભાગ હતો.
યુક્રેન યુદ્ધ, જેને બીજા વિશ્વયુદ્ધ પછી યુરોપમાં સૌથી લોહિયાળ યુદ્ધ તરીકે પણ ઓળખવામાં આવે છે, તે હવે પાંચમા વર્ષમાં પ્રવેશી ચૂક્યું છે.
યુએસ હાઉસ ઓફ રિપ્રેઝન્ટેટિવ્સે રશિયા પર યુક્રેન યુદ્ધને લઈને આર્થિક દબાણ વધારવાના ઉદ્દેશ્ય સાથે પ્રતિબંધોનું એક વ્યાપક પેકેજ પસાર કર્યું.
આ બિલ, જે રશિયા પાસેથી તેલ ખરીદતા દેશો પર ૧૦૦ ટકા ટેરિફ (આયાત જકાત) લાદવાની ચેતવણી આપે છે, તેને હવે સહી માટે રાષ્ટ્રપતિ ડોનાલ્ડ ટ્રમ્પને મોકલવામાં આવ્યું છે.
આ બિલ ૨૬૨-૧૫૯ના મતોની બહુમતીથી પસાર કરવામાં આવ્યું હતું. શરૂઆતમાં આ બિલને સ્વર્ગસ્થ સેનેટર અને ટ્રમ્પના સહયોગી લિન્ડસે ગ્રેહામનું સમર્થન મળ્યું હતું, જેમણે રશિયન તેલ ખરીદતા અને “યુક્રેનમાં યુદ્ધને વેગ આપતા” દેશો પર ૫૦૦ ટકા ટેરિફ લાદવાનું સૂચન કર્યું હતું.
રશિયા પર પ્રતિબંધો મૂકવાના બિલને સમર્થન આપવામાં મહત્વની ભૂમિકા ભજવનાર યુએસ સેનેટર જીન શાહીને કહ્યું, “આજે એક મોટો દિવસ છે. કોંગ્રેસે હમણાં જ પુતિનને એક સ્પષ્ટ સંદેશ મોકલ્યો છે.”
આ બિલ રશિયાના ટેન્કરોના “શેડો ફ્લીટ” (ગુપ્ત કાફલા) ને પણ નિશાન બનાવે છે જે હાલના પ્રતિબંધોને ટાળે છે.
મોસ્કો સાથેના વેપારને કારણે આ બિલથી પ્રભાવિત થનારા મુખ્ય દેશોમાં ભારત, ચીન, સ્લોવાકિયા, હંગેરી અને અઝરબૈજાનનો સમાવેશ થાય છે.
આ ખરડો પસાર થયા બાદ ભારતે પુનરોચ્ચાર કર્યો હતો કે, ઊર્જા બજારમાં અસ્થિરતા વચ્ચે તે પોતાની જનતાના રાષ્ટ્રીય હિતને અનુરૂપ તેલ અને ક્રૂડની ખરીદી અંગેના ર્નિણયો લેશે.