પીએમ મોદીએ રવિવારે પ્રસારિત ‘મન કી બાત’ના 133મા એપિસોડમાં વસ્તી ગણતરીનો ઉલ્લેખ કર્યો. પીએમએ કહ્યું- આપણા દેશમાં આ સમયે એક ખૂબ જ મહત્વપૂર્ણ અભિયાન ચાલી રહ્યું છે, જેના વિશે દરેક ભારતીયને જાણકારી હોવી જરૂરી છે.
આ છે વસ્તી ગણતરીનું અભિયાન, આ દુનિયાની સૌથી મોટી વસ્તી ગણતરી છે. જે સાથીઓ પહેલાથી આ પ્રકારની પ્રક્રિયામાંથી પસાર થયા છે, આ વખતે વસ્તી ગણતરીનો તેમનો અનુભવ, અલગ થવાનો છે.
પીએમએ કહ્યું- જે રાજ્યોમાં સ્વ-ગણતરીનું કામ પૂરું થઈ ગયું છે, ત્યાં ઘરોની લિસ્ટિંગનું કામ ચાલુ છે. અત્યાર સુધીમાં લગભગ 1 કરોડ 20 લાખ પરિવારોના મકાનોની લિસ્ટિંગનું કામ પૂરું પણ થઈ ચૂક્યું છે.
વસ્તી ગણતરીમાં તમારી ભાગીદારી સરળ બનાવવામાં આવી છે: તમે પોતે પણ તમારી માહિતી ભરી શકો છો. કર્મચારીના આવવાના 15 દિવસ પહેલા તમારા માટે સુવિધા શરૂ થશે. તમે તમારા સમય અનુસાર માહિતી ભરી શકો છો. જ્યારે તમે પ્રક્રિયા પૂર્ણ કરો છો, ત્યારે તમને એક વિશેષ ID મળે છે. આ ID તમારા મોબાઇલ અથવા ઇમેઇલ પર આવે છે. પછીથી જ્યારે કર્મચારી તમારા ઘરે આવે છે, ત્યારે તમે આ જ ID બતાવીને માહિતીની પુષ્ટિ કરી શકો છો. આનાથી ફરીથી માહિતી આપવાની જરૂર પડતી નથી.
બુદ્ધનો સંદેશ આજે પણ મહત્વનો: આજે પણ મે મહિનાની શરૂઆત એક પવિત્ર અવસર સાથે થવા જઈ રહી છે. થોડા જ દિવસોમાં આપણે બુદ્ધ પૂર્ણિમા ઉજવીશું. હું આપ સૌ દેશવાસીઓને અગાઉથી મારી શુભેચ્છાઓ પાઠવું છું. ભગવાન ગૌતમ બુદ્ધનો જીવન સંદેશ આજે પણ એટલો જ પ્રાસંગિક છે. તેમણે આપણને શીખવ્યું છે કે શાંતિ આપણા અંદરથી શરૂ થાય છે, તેમણે જણાવ્યું છે કે સ્વયં પર વિજય સૌથી મોટો વિજય હોય છે.
પર્યાવરણ સંરક્ષણના ભવ્ય પ્રતીકો: કચ્છના રણમાં વરસાદ પૂરો થતાં જ અહીંની ધરતી જીવંત બની જાય છે. દર વર્ષે લાખો ફ્લેમિંગો અહીં આવે છે. આખો વિસ્તાર ગુલાબી રંગથી રંગાઈ જાય છે, તેથી તેને ‘ફ્લેમિંગો સિટી’ કહેવામાં આવે છે. આ પક્ષીઓ અહીં જ માળા બનાવે છે અને પોતાના બચ્ચાઓને મોટા કરે છે. કચ્છના લોકો તેમને ‘લાખાજીના જાનૈયા’ કહે છે. હવે લાખાજીના આ જાનૈયા કચ્છમાં પર્યાવરણ સંરક્ષણના ખૂબ સુંદર પ્રતીકો બની ગયા છે.
વિન્ડ એનર્જીમાં ભારત ઝડપથી આગળ વધી રહ્યું છે: આજે પવન-શક્તિ ભારતના વિકાસની નવી કહાની લખી રહી છે. ભારતે હાલમાં પવન-ઊર્જા એટલે કે વિન્ડ એનર્જીમાં મોટી સિદ્ધિ મેળવી છે. હવે ભારતની વિન્ડ એનર્જી જનરેશન કેપેસિટી 56 ગીગાવોટથી વધુ થઈ ગઈ છે. છેલ્લા એક વર્ષમાં જ લગભગ 6 ગીગાવોટ નવી ક્ષમતા જોડાઈ છે. વિન્ડ એનર્જીમાં ભારત ઝડપથી આગળ વધી રહ્યું છે અને દુનિયા પણ આપણી તરફ જોઈ રહી છે.
ભારતના વિકાસ માટે પવન ઊર્જા જરૂરી: ગુજરાત, તમિલનાડુ, મહારાષ્ટ્ર, રાજસ્થાન જેવા દેશના અનેક રાજ્યો આ ક્ષેત્રમાં પોતાનો ઝંડો લહેરાવી રહ્યા છે. ગુજરાતના કચ્છ, પાટણ, બનાસકાંઠા જેવા વિસ્તારો જ્યાં પહેલા માત્ર રણ દેખાતું હતું. આજે ત્યાં મોટા રિન્યુએબલ એનર્જી પાર્ક બની રહ્યા છે. આનો લાભ યુવાનોને મળી રહ્યો છે, નવી તકો ઊભી થઈ રહી છે, નવી સ્કિલ્સ વિકસિત થઈ રહી છે, રોજગારના નવા રસ્તાઓ ખુલી રહ્યા છે. સાથીઓ, ભારતના વિકાસ માટે સૌર અને પવન ઊર્જા જરૂરી છે.
સમગ્ર નોર્થઈસ્ટમાં વાંસ સેક્ટર વિકસી રહ્યું છે: અંગ્રેજો દ્વારા બનાવેલા કાયદા મુજબ વાંસને વૃક્ષ તરીકે વ્યાખ્યાયિત કરવામાં આવ્યો હતો અને તેનાથી સંબંધિત નિયમો ખૂબ કડક હતા. ક્યાંય પણ વાંસને લઈ જવું ખૂબ મુશ્કેલ હતું. આવી સ્થિતિમાં અહીંના લોકો વાંસ સંબંધિત કામધંધાથી દૂર થતા ગયા. સાથીઓ, વર્ષ 2017માં કાયદામાં ફેરફાર કરીને અમે વાંસને વૃક્ષની શ્રેણીમાંથી બહાર કર્યો. જેના પરિણામો બધાની સામે છે. આજે સમગ્ર નોર્થઈસ્ટમાં વાંસ સેક્ટર વિકસી રહ્યું છે.