૨૧ ઓગસ્ટના રોજ જંતર-મંતર પર જાહેર શૈક્ષણિક સંસ્થાઓ અને સરકારી નોકરીઓમાં જાતિ-આધારિત અનામતને આવક-આધારિત ક્વોટા સાથે બદલવાની માંગણી સાથે થયેલા વિરોધ બાદ કેન્દ્રીય મંત્રી જેપી નડ્ડા ગુરુવારે (૨૭ ઓગસ્ટ) ક્વોટા-સુધારા આંદોલનના કાર્યકરોના પ્રતિનિધિમંડળને મળ્યા હતા.
બેઠક પછી, બંને પક્ષોએ બેઠકને સૌહાર્દપૂર્ણ ગણાવી હતી અને જાહેરાત કરી હતી કે આગામી બેઠક ૭ સપ્ટેમ્બરના રોજ યોજાશે.
સૌહાર્દપૂર્ણ ચર્ચા યોજાઈ: જેપી નડ્ડા
ઠ પર એક પોસ્ટમાં, નડ્ડાએ જણાવ્યું હતું કે સૌહાર્દપૂર્ણ વાતચીત અગાઉના નિર્ધારિત સમયપત્રક અનુસાર યોજાઈ હતી અને ક્વોટા-સુધારા કાર્યકરો સાથે બીજી બેઠક ટૂંક સમયમાં યોજાશે. “૨૧ ઓગસ્ટના રોજ જંતર-મંતર ખાતે વિરોધ પ્રદર્શન પછી, ટીમના સભ્યો હર્ષ દુબે, રણ બહાદુર સિંહ ચૌહાણ અને મૃત્યુંજય પાઠક સાથે સુનિશ્ચિત સમયપત્રક મુજબ સૌહાર્દપૂર્ણ ચર્ચા યોજાઈ હતી. અમે ટૂંક સમયમાં ફરી મળીશું,” આરોગ્ય મંત્રીએ જણાવ્યું.
સંવાદ તરફ મહત્વપૂર્ણ પગલું
હર્ષ દુબેએ બેઠકને સમાજના તમામ વર્ગોના હિતમાં સકારાત્મક પગલું ગણાવ્યું. તેમણે કહ્યું કે પ્રતિનિધિમંડળે નડ્ડા સાથે ૨૧ ઓગસ્ટના વિરોધ પ્રદર્શન અંગે ટૂંકમાં ચર્ચા કરી અને આ વાતચીતને સંવાદ જાળવવા તરફ એક મહત્વપૂર્ણ પગલું ગણાવ્યું.
“બધા સમાજના હિતમાં એક સકારાત્મક પહેલ. આજે, અમારી ટીમ જેપી નડ્ડા સાથે મળી. આ દરમિયાન, અમે ૨૧ ઓગસ્ટના રોજ યોજાયેલા વિરોધ પ્રદર્શન અંગે ટૂંકી ચર્ચા કરી. આ બેઠક સંવાદ તરફ એક મહત્વપૂર્ણ પગલું છે. અમે ખૂબ જ ટૂંક સમયમાં ફરી મળીશું અને બધા સમાજના હિતમાં સકારાત્મક અને ન્યાયી ર્નિણય સાથે આગળ વધવાનો પ્રયાસ કરીશું,” દુબેએ કહ્યું.
તેમણે વધુમાં કહ્યું કે તેમનો ઉદ્દેશ્ય કોઈપણ વર્ગ વિરુદ્ધ નથી, પરંતુ લોકશાહી અને શાંતિપૂર્ણ રીતે સમાન તકો, ન્યાયી વ્યવસ્થા અને રાષ્ટ્રીય હિતમાં જરૂરી સુધારાઓ માટે અમારા વિચારો રજૂ કરવાનો છે.
જેમને તેની જરૂર છે તેમના માટે અનામત
જેપી નડ્ડા સાથે મુલાકાત કર્યા પછી, હર્ષ દુબે, રણ બહાદુર સિંહ ચૌહાણ અને મૃત્યુંજય પાઠકે મીડિયાને સંબોધન કર્યું અને કહ્યું કે પ્રતિનિધિમંડળને તેમના વિરોધ પ્રદર્શનમાં મોટી સંખ્યામાં ઉપસ્થિતિને પગલે કેન્દ્રીય નેતૃત્વ સાથે વાતચીત કરવાની તક આપવામાં આવી છે.
તેમણે કહ્યું કે બે દિવસ સુધી ચર્ચાઓ થઈ હતી, જે દરમિયાન અનામત સુધારા સહિત વિવિધ મુદ્દાઓ પર વિગતવાર ચર્ચા કરવામાં આવી હતી. નેતાઓએ જણાવ્યું હતું કે તેઓ અનામતનો અંત લાવવા માંગતા નથી, પરંતુ જેમને ખરેખર અનામતનો લાભ જાેઈએ છે તેમને તે મળે તે સુનિશ્ચિત કરવા માટે સુધારાઓની હિમાયત કરી રહ્યા છે.
પ્રતિનિધિમંડળે જણાવ્યું હતું કે સરકાર સાથે તેમની આગામી ચર્ચા ૭ સપ્ટેમ્બરના રોજ યોજાવાની છે અને વિશ્વાસ વ્યક્ત કર્યો હતો કે વાતચીત સકારાત્મક દિશામાં આગળ વધી રહી છે.
તેમણે એ પણ ભાર મૂક્યો હતો કે આંદોલન કોઈ વ્યક્તિ પર કેન્દ્રિત નથી, કારણ કે વિરોધ દરમિયાન ઉઠાવવામાં આવેલી માંગણીઓ સમાજના વિવિધ વર્ગોના લોકોની ચિંતાઓને પ્રતિબિંબિત કરે છે.