નડિયાદ નજીક અમદાવાદ-વડોદરા એક્સપ્રેસ હાઈવે પર ચકલાસી પાસે શનિવારે બપોરે એક મોટી દુર્ઘટના સર્જાઈ છે.
કેમિકલ ભરેલું ટેન્કર (GJ 06 AT 6296) હાઈવેની રેલિંગ તોડીને 20 ફૂટ ઊંડા ખાડામાં પડ્યું છે.
ટેન્કરમાં દહેજથી અમદાવાદ લઈ જવાતું 16,000 લિટર હાઈડ્રોજન પેરોક્સાઈડ કેમિકલ ભરેલું હતું.
અકસ્માતમાં ડ્રાઈવરનો આબાદ બચાવ થયો છે. જોકે, ટેન્કર પલટી જતાં કેમિકલ લીકેજ શરૂ થયું છે.
ઘટનાની જાણ થતાં નડિયાદ અને આણંદ ફાયર બ્રિગેડની ટીમો, પોલીસ અને SDRF સ્થળ પર પહોંચી ગઈ છે.
આણંદ ફાયર બ્રિગેડની ત્રણ ગાડીઓ દ્વારા પાણીનો મારો ચલાવી કેમિકલ લીકેજ અટકાવવાની કામગીરી ચાલી રહી છે.
નડિયાદ ડીવાયએસપી વી.આર.બાજપાઈએ જણાવ્યું કે, અકસ્માતમાં કોઈ જાનહાની થઈ નથી. આણંદ ફાયર બ્રિગેડના ઓફિસર ધર્મેશ ગોરના જણાવ્યા મુજબ, ક્રેન દ્વારા ટેન્કરને ઊભું કરવાની કામગીરી ચાલી રહી છે. જેથી લીકેજને વધુ અસરકારક રીતે રોકી શકાય.
નોંધનીય છે કે, થોડા મહિના પહેલા પણ બિલોદરા નજીક આવી જ રીતે કેમિકલ ટેન્કર પલટી ગયું હતું.
ઘટનાની ગંભીરતાને ધ્યાનમાં રાખી નડિયાદ ડીવાયએસપી અને ડેપ્યુટી કમિશનર સહિતના અધિકારીઓ પણ સ્થળ પર પહોંચ્યા છે.
