યુક્રેનિયન સેનાએ જણાવ્યું હતું કે રશિયન સેનામાં સેવા આપતા એક ભારતીય નાગરિકે યુક્રેનિયન દળો સમક્ષ આત્મસમર્પણ કર્યું છે. યુક્રેનિયન સેનાની ૬૩મી મિકેનાઇઝ્ડ બ્રિગેડે તેની ટેલિગ્રામ ચેનલ પર એક વિડિઓ પ્રકાશિત કર્યો છે જેમાં ભારતીય નાગરિક પોતાને ગુજરાતના ૨૨ વર્ષીય માજાેતી સાહિલ મોહમ્મદ હુસૈન તરીકે ઓળખાવે છે.
ભારતીય અધિકારીઓએ હજુ સુધી આ બાબતે કોઈ ટિપ્પણી કરી નથી. સત્તાવાર સૂત્રોએ જણાવ્યું હતું કે કિવમાં ભારતીય દૂતાવાસ અહેવાલની સત્યતા ચકાસી રહ્યું છે, અને ઉમેર્યું હતું કે અત્યાર સુધી યુક્રેનિયન અધિકારીઓ તરફથી કોઈ ઔપચારિક સંદેશાવ્યવહાર પ્રાપ્ત થયો નથી.
વિદ્યાર્થીથી સૈનિક સુધી
ધ કિવ ઇન્ડિપેન્ડન્ટ અનુસાર, હુસૈન યુનિવર્સિટીનો અભ્યાસ કરવા માટે રશિયા ગયો હતો. યુક્રેનિયન દળો દ્વારા બહાર પાડવામાં આવેલા વિડિઓમાં, તેણે કહ્યું કે તેને ડ્રગ સંબંધિત આરોપોમાં રશિયન જેલમાં સાત વર્ષની સજા ફટકારવામાં આવી હતી અને પછી તેને કેદ ટાળવા માટે રશિયન સેના સાથે કરાર પર હસ્તાક્ષર કરવાની તક આપવામાં આવી હતી.
“હું જેલમાં રહેવા માંગતો ન હતો, તેથી મેં ખાસ લશ્કરી કાર્યવાહી માટે કરાર પર હસ્તાક્ષર કર્યા. પરંતુ હું ત્યાંથી બહાર નીકળવા માંગતો હતો,” હુસૈને કહ્યું. તેમણે ઉમેર્યું કે માત્ર ૧૬ દિવસની તાલીમ પછી, તેમને ૧ ઓક્ટોબરના રોજ તેમના પ્રથમ યુદ્ધ મિશન પર મોકલવામાં આવ્યા, જે ત્રણ દિવસ સુધી ચાલ્યું.
કમાન્ડર સાથેના વિવાદ પછી શરણાગતિ
હુસેને કહ્યું કે તેમણે તેમના કમાન્ડર સાથેના મુકાબલા બાદ શરણાગતિ સ્વીકારવાનો ર્નિણય લીધો. “મને લગભગ બે થી ત્રણ કિલોમીટર દૂર યુક્રેનિયન ખાઈની જગ્યા મળી,” તેમણે કહ્યું. “મેં તરત જ મારી રાઇફલ નીચે મૂકી દીધી અને કહ્યું કે હું લડવા માંગતો નથી. મને મદદની જરૂર છે. હું રશિયા પાછો જવા માંગતો નથી.”
યુક્રેનિયન બ્રિગેડે તેની પોસ્ટમાં જણાવ્યું હતું કે હુસેન શરૂઆતમાં ડ્રગ્સ સાથે પકડાયો હતો અને “જેલમાં ન જવા માટે” લશ્કરમાં જાેડાયો હતો.
ભારત રશિયન સેનામાં નાગરિકોની મુક્તિ માંગે છે
ગયા મહિને, ભારતના વિદેશ મંત્રાલય (સ્ઈછ) એ કહ્યું હતું કે તેણે રશિયાને હાલમાં રશિયન સેનામાં સેવા આપી રહેલા ૨૭ ભારતીય નાગરિકોને મુક્ત કરવા અને સ્વદેશ પરત મોકલવા માટે ભારપૂર્વક વિનંતી કરી હતી. એવા અહેવાલો બહાર આવ્યા છે જે સૂચવે છે કે વિદ્યાર્થી અને વ્યવસાયિક વિઝા પર કેટલાક ભારતીયોને યુક્રેનમાં યુદ્ધની ફ્રન્ટલાઈન પર રશિયન લશ્કરી એકમોમાં જાેડાવા માટે દબાણ કરવામાં આવ્યું હતું.
ભારતે રશિયા પર સતત દબાણ કર્યું છે કે તે તેના સૈન્યમાં સહાયક સ્ટાફ તરીકે કામ કરતા તમામ ભારતીય નાગરિકો – જેમ કે રસોઈયા અને મદદગારો – ને મુક્ત કરે. ગયા વર્ષે રશિયાની મુલાકાત દરમિયાન વડા પ્રધાન નરેન્દ્ર મોદીએ પણ આ મુદ્દો ઉઠાવ્યો હતો.
સત્તાવાર માહિતી અનુસાર, રશિયન સૈન્ય દ્વારા ૧૫૦ થી વધુ ભારતીય નાગરિકોની ભરતી કરવામાં આવી છે. ઓછામાં ઓછા ૧૨ યુદ્ધમાં માર્યા ગયા છે, જ્યારે ૯૬ ને રજા આપવામાં આવી છે. અન્ય ૧૬ હજુ પણ ગુમ છે.