મંત્રીશ્રીએ માતૃભૂમિને શીશ નમાવીને પ્રણામ કર્યા બાદ ગામના વિવિધ મંદિરોમાં દર્શન કરીને આશીર્વાદ પ્રાપ્ત કર્યા
ભાવનગરના ધારાસભ્ય શ્રી જીતુભાઈ વાઘાણી પુન: કેબિનેટ મંત્રી બનતા સમગ્ર ભાવનગર શહેર અને જિલ્લામાં ઉત્સાહનો માહોલ છવાયો છે. આ ખુશીના પગલે ઠેર ઠેર તેમનું સન્માન કરવામાં આવી રહ્યું છે, ત્યારે તેમના માદરે વતન નાના સુરકા ગામે ગ્રામજનો દ્વારા ભવ્ય સન્માન સમારોહનું આયોજન કરવામાં આવ્યું હતું.
કેબિનેટ મંત્રી શ્રી જીતુભાઈ વાઘાણી નાના સુરકા ગામે પહોંચતા જ તેમનું ભવ્ય સ્વાગત કરવામાં આવ્યું હતું. તેમણે માતૃભૂમિને શીશ નમાવીને પ્રણામ કર્યા બાદ ગામના નાના-મોટા મંદિરોમાં દર્શન કરીને આશીર્વાદ લીધા હતા. આ પ્રસંગે નાના સુરકા ગામના ગ્રામજનોમાં અનેરો ઉત્સાહ અને થનગનાટ જાેવા મળ્યો હતો.
સન્માન સમારોહમાં સાંસદ શ્રી નિમુબેન બાંભણીયા, ધારાસભ્ય શ્રી સેજલબેન પંડ્યા સહિત વિવિધ રાજકીય અને સામાજિક ક્ષેત્રના અગ્રણીઓ ઉપસ્થિત રહ્યા હતા.
ગામની બહેન દીકરીઓ દ્વારા કેબિનેટ મંત્રી શ્રી જીતુભાઈ વાઘાણીને કુમકુમ તિલક કરીને ઘોડા પર સવાર કરાવીને રેલી સ્વરૂપે સન્માન સમારોહ સ્થળે લઈ જવામાં આવ્યા હતા.
આ દરમિયાન શ્રી જીતુભાઈ વાઘાણીએ નાના સુરકા ગામના વડીલોના આશીર્વાદ લીધા હતા અને સાથી મિત્રોને હેતપૂર્વક મળ્યા હતા.
મંત્રીશ્રીના સ્વાગત અને સન્માન સમયે ગ્રામજનોમાં ઉત્સાહનો સંચાર થયો હતો. આ પ્રસંગે શ્રી જીતુભાઈ વાઘાણીએ સમયને ઉચિત સંબોધન કરીને ગ્રામજનોનો હૃદયપૂર્વક આભાર વ્યક્ત કર્યો હતો.