સિંહ સદનની નકલી વેબસાઈટ બનાવનાર રાશિદ રાજસ્થાનથી ઝડપાયો
૧૬ ઓક્ટોબરના રોજ સિંહ દર્શન કરવા આવતા પ્રવાસીઓ માટે સાસણ ગીર નેચર સફારી પાર્ક ખુલ્લું મુકાયું હતું. અહીં આવતા પ્રવાસીઓ ઉત્તમ રહેવા-જમવાની સુવિધા માટે ઓનલાઈન બુકિંગનો આગ્રહ રાખતા હોય છે. પરંતુ આ જ ઇચ્છાઓનો ગેરલાભ ઉઠાવીને રાશિદ ખાન નામના શખસે સરકારી સિંહ સદન ગેસ્ટ હાઉસની આબેહૂબ દેખાતી નકલી વેબસાઈટ બનાવી હતી.
સિંહ દર્શને આવતા પ્રવાસીઓ સાથે ઓનલાઈન સિંહ સદન ગેસ્ટ હાઉસના રૂમ બુકિંગના નામે હજારો રૂપિયાની રકમ પોતાના બેંક ખાતામાં ટ્રાન્સફર કરાવી લઈ મોટાપાયે છેતરપિંડી આચરી હતી. પોલીસે આરોપી રાશિદ ખાનને રાજસ્થાનથી ઝડપી પાડ્યો છે. ઉલ્લેખનીય છે કે, ૭ નવેમ્બરના રોજ વન વિભાગના રેન્જ ફોરેસ્ટ અધિકારીએ મેંદરડા પોલીસ સ્ટેશનમાં આ અંગે ફરિયાદ નોંધાવી હતી. જૂનાગઢ એસપી સુબોધ ઓડેદરાએ જણાવ્યું હતું કે, સાસણમાં સફારી પાર્ક અને રેસ્ટ હાઉસ (સિંહ સદન)ની નકલી વેબસાઈટ બનાવી છેતરપિંડી કરી હોવાની મેંદરડા પોલીસ સ્ટેશનમાં ફરિયાદ નોંધાઈ હતી.
વન વિભાગના અધિકારીની ફરિયાદ નોંધાવ્યા મુજબ જે પ્રવાસીઓએ જંગલ સફારી કરવા સિંહ સદનમાં રોકાવા માટેની ઓનલાઈન ટિકિટ બુક કરાવી હોય અને તે રિસીપ્ટ વન વિભાગને બતાવતા અધિકારીએ સ્પષ્ટ કર્યું હતું કે, સિંહ સદનમાં રોકવા માટે આવી કોઇ ઓનલાઈન બુકિંગ સુવિધા ઉપલબ્ધ નથી. ગત તારીખ ૭ નવેમ્બર ૨૦૨૫ના સાસણ ગેસ્ટ હાઉસ ખાતે રેન્જ ફોરેસ્ટ અધિકારી તરીકે ફરજ બજાવતા યશ ભરતકુમાર ઉમરાણીયાએ આ અંગે ફરિયાદ નોંધાવી હતી. તેમણે જણાવ્યું હતું કે, સિંહ સદન ગેસ્ટ હાઉસમાં પ્રોટોકોલ મુજબ સરકારી મહેમાનોને વ્યવસ્થા અપાય છે.
જ્યારે બિન-સરકારી પ્રવાસીઓને રિસેપ્શન પરથી કરન્ટ બુકિંગ દ્વારા રૂમ ફાળવવામાં આવે છે. સૌથી અગત્યની વાત એ છે કે, સિંહ સદન ગેસ્ટ હાઉસના રૂમ બુકિંગ માટે આજદિન સુધી કોઈ સત્તાવાર ઓનલાઈન વેબસાઈટ કાર્યરત નથી. અને ના તો વન વિભાગે કોઈ વેબસાઈટને ઓનલાઈન બુકિંગના અધિકાર આપ્યા છે. મેંદરડા પોલીસ સ્ટેશનના પીઆઇ અને તેમની ટીમ દ્વારા ટેકનિકલ અને હ્યુમન સોર્સિસના આધારે સઘન તપાસ શરૂ કરવામાં આવી હતી. આ તપાસના અંતે સિંહ સદન અને જંગલ સફારી પાર્કની નકલી બુકિંગ વેબસાઈટ બનાવનાર મુખ્ય આરોપી રાજસ્થાનના મેવાતમાં રહેતા રાશિદ ખાન અયુબ ખાનને પોલીસે ઝડપી પાડ્યો છે. પોલીસ આરોપી પાસેથી બે મોબાઈલ ફોન કબજે કર્યા છે.
હાલ ઝડપાયેલા આરોપીની પોલીસ દ્વારા પ્રાથમિક પૂછપરછ કરવામાં આવી છે અને તેના રિમાન્ડની પણ માગણી કરવામાં આવી છે. પોલીસ આ મામલે વધુ તપાસ કરી રહી છે કે, આ ગુનામાં તેની મદદ અન્ય કોણે કરી છે. આરોપી રાશિદ ખાનની પ્રાથમિક પૂછપરછમાં જાણવા મળ્યું છે કે, આરોપીએ માત્ર સિંહ સદનની જ નહીં પણ જગન્નાથ મંદિર ટ્રસ્ટ અને શ્રીરામ આશ્રમ નામની પણ અલગ અલગ વેબસાઈટ બનાવી હતી. ઠગ આરોપીએ અસલી જેવી દેખાતી બનાવટી વેબસાઈટો ઊભી કરી હતી. આ વેબસાઈટ પર સંપર્ક માટે વ્હોટ્સએપ બિઝનેસ એકાઉન્ટ નંબર મૂકીને પોતે સરકારી સિંહ સદન ગેસ્ટ હાઉસનો કર્મચારી હોવાની ખોટી ઓળખ આપી હતી. પ્રવાસીઓને ઓનલાઈન રૂમ બુકિંગના નામે છેતરીને હજારો રૂપિયાની રકમ પોતાના બેંક ખાતામાં ટ્રાન્સફર કરાવી લેતો હતો. ઉલ્લેખનીય છે કે, વન વિભાગને સહકર્મચારીઓ મારફતે આ નકલી વેબસાઈટ વિશે જાણકારી મળી હતી. બાદમાં અનેક પ્રવાસીઓ છેતરપિંડીનો ભોગ બન્યા હોવાની રજૂઆતો સાથે સામે આવ્યા હતા. અત્યાર સુધીમાં દ્ગઁઝ્રઇઁ પોર્ટલ પર આરોપી વિરૂદ્ધ ૨૦થી વધુ ફરિયાદો નોંધાઈ છે.
પ્રથમ કેસ: વલસાડના જતીનભાઈ ધીરજલાલ શેઠે ગુગલ બ્રાઉઝરમાં સર્ચ કરીને એક વેબસાઈટ મારફતે વ્હોટ્સએપ નંબર પર સંપર્ક કર્યો હતો. ઠગે જમ્મુ અને કાશ્મીર બેંકના ખાતામાં રૂ. ૧૧,૯૦૦ ટ્રાન્સફર કરાવ્યા અને તેમને નકલી રિસીપ્ટ પણ મોકલી આપી.
બીજાે કેસ: વધુ વેરિફિકેશન માટે રેન્જ ફોરેસ્ટ અધિકારીએ બીટગાર્ડ રવિભાઈ લીંબાડને એક રૂમ બુક કરવા જણાવ્યું હતું. રવિભાઈએ ૩૧ ઓક્ટોબર ૨૦૨૫ના વ્હોટ્સએપ પર સંપર્ક કરતા ઠગે ઇન્ડિયન ઓવરસીઝ બેંકના ખાતામાં રૂ. ૩,૦૦૦ એડવાન્સ પેમેન્ટ કરવા જણાવ્યું હતું. રવિભાઈએ ેંઁૈં મારફતે આ રકમ મોકલી આપી, પરંતુ ત્યારબાદ સામેવાળાએ રૂમ કન્ફર્મેશનની રિસીપ્ટ મોકલી નહોતી અને રવિભાઈનો નંબર બ્લોક કરી દીધો હતો.
ત્રીજાે કેસ: મુંબઈના સંજયભાઈ પદ્મનાભન પાસેથી પણ નકલી વેબસાઈટ દ્વારા જ સંપર્ક કરીને એક્સિસ બેંકના ખાતામાં રૂ. ૧૪,૦૦૦ ટ્રાન્સફર કરાવી લેવામાં આવ્યા હતા.
વન વિભાગ દ્વારા પ્રવાસીઓને અપીલ કરવામાં આવી છે કે, તેઓ સિંહ સદનના રૂમ બુકિંગ માટે કોઈપણ ઓનલાઈન વેબસાઈટનો ઉપયોગ ન કરે અને માત્ર વન વિભાગના કાઉન્ટ પરથી જ કરન્ટ બુકિંગ કરાવે.