ભારતીય સેનાના જવાન દિનેશભાઈ પાલાભાઈ લગારીયાને તેમની વીરતા અને કર્તવ્યનિષ્ઠા બદલ સેના મેડલથી સન્માનિત કરવામાં આવ્યા છે. જામનગરમાં રહેતા અને મૂળ ખંભાળિયા તાલુકાના માધુપુર ગામના વતની દિનેશભાઈને જયપુરમાં આર્મી ડે નિમિત્તે આ સન્માન મળ્યું હતું. દિનેશભાઈએ ‘ઓપરેશન સિંદૂર’ દરમિયાન અદમ્ય શૌર્યનું પ્રદર્શન કર્યું હતું. તેમણે મિસાઈલનો ઉપયોગ કરીને આતંકવાદીઓના ઠેકાણાઓને સફળતાપૂર્વક ધ્વસ્ત કર્યા હતા.
12મી બટાલિયન ધ ગ્રેનેડિયર્સ રેજિમેન્ટમાં ફરજ બજાવતા લાન્સ હવાલદાર દિનેશભાઈ લગારીયાને મે 2025માં (મૂળ માહિતી મુજબ) આતંકવાદી મિસાઈલ હુમલો નિષ્ફળ બનાવવાનું કાર્ય સોંપવામાં આવ્યું હતું.
સતત ગોળીબાર વચ્ચે, તેમણે એન્ટી ટેન્ક ગાઈડેડ મિસાઈલની મદદથી નિર્ધારિત લક્ષ્યને નષ્ટ કર્યું, જેનાથી દુશ્મનની ક્ષમતાઓને મોટો ફટકો પડ્યો અને તેમની યોજનાઓ નિષ્ફળ બની. તેમના આ અધિક સાહસ અને સંગઠન પ્રત્યેની અતૂટ નિષ્ઠા બદલ તેમને સેના મેડલ એનાયત કરવામાં આવ્યો છે. આ સિદ્ધિથી જામનગર અને સમગ્ર હાલાર પ્રદેશનું ગૌરવ વધ્યું છે.