ગુજરાતના રાજ્યપાલ આચાર્ય દેવવ્રત 20 અને 21 જાન્યુઆરીના રોજ ગીર સોમનાથ જિલ્લાની બે દિવસીય મુલાકાત લેશે. તેમની આ મુલાકાત શિક્ષણ, પ્રાકૃતિક કૃષિ, સ્વચ્છતા અને ગ્રામ વિકાસ જેવા મહત્વના મુદ્દાઓ પર કેન્દ્રિત રહેશે. મુલાકાતના પ્રથમ દિવસે, 20 જાન્યુઆરીએ, રાજ્યપાલ વેરાવળ સ્થિત સોમનાથ સંસ્કૃત યુનિવર્સિટીના પદવીદાન સમારોહમાં હાજરી આપશે. તેઓ વિદ્યાર્થીઓને સંબોધિત કરશે અને આશીર્વાદ આપશે.
પદવીદાન સમારોહ બાદ રાજ્યપાલ તાલાલા તાલુકાના ઉમરેઠી ગામની મુલાકાત લેશે. ત્યાં તેઓ પ્રાકૃતિક કૃષિ અપનાવનારા ખેડૂતો સાથે ‘પ્રાકૃતિક કૃષિ પરિસંવાદ’માં સીધો સંવાદ કરશે. તેઓ રાસાયણિક ખાતર અને દવાઓ વિના ખેતી કરીને જમીન, પર્યાવરણ અને માનવ સ્વાસ્થ્યને સુરક્ષિત રાખવાના મહત્વ પર ભાર મૂકશે. રાજ્યપાલ ઉમરેઠી ગામમાં રાત્રિ રોકાણ કરશે અને ‘ગ્રામ કલ્યાણ કાર્યક્રમ’માં ભાગ લેશે. તેઓ ગ્રામજનો સાથે સંવાદ સાધી તેમની સમસ્યાઓ અને જરૂરિયાતો સમજવાનો પ્રયાસ કરશે.
બીજા દિવસે, 21 જાન્યુઆરીએ, રાજ્યપાલ ઉમરેઠી ગામમાં સ્વચ્છતા અભિયાનમાં જોડાશે અને વૃક્ષારોપણ કરશે. આ કાર્યક્રમો દ્વારા તેઓ સ્વચ્છતા, પર્યાવરણ સંરક્ષણ અને સ્વાવલંબનનો સંદેશ આપશે.