સુરેન્દ્રનગર મહાનગરપાલિકાએ પ્રતિબંધિત સિંગલ યુઝ પ્લાસ્ટિકના વેપાર સામે કડક કાર્યવાહી હાથ ધરી છે. શહેરમાં વિવિધ સ્થળોએ દરોડા પાડીને કુલ 1200 કિલોથી વધુ પ્લાસ્ટિક જપ્ત કરવામાં આવ્યું છે. આ કાર્યવાહીમાં ત્રણ વેપારીઓને કુલ 50,000 રૂપિયાનો દંડ ફટકારવામાં આવ્યો છે.
મ્યુનિસિપલ કમિશનર ડો. નવનાથ ગવ્હાણેના માર્ગદર્શન હેઠળ અને નાયબ મ્યુનિસિપલ કમિશનર કે.આર. ચૌહાણની અધ્યક્ષતામાં સોલિડ વેસ્ટ મેનેજમેન્ટ ટીમે આ તપાસ હાથ ધરી હતી. ટીમે શહેરના વિવિધ વિસ્તારોમાં અચાનક દરોડા પાડ્યા હતા.
આ રેડ દરમિયાન મહેતા માર્કેટ સ્થિત જય સેલ્સ એજન્સી અને જય પ્લાસ્ટિકમાંથી કુલ 800 કિલો સિંગલ યુઝ પ્લાસ્ટિક જપ્ત કરાયું હતું. આ ઉપરાંત, ગણેશ ટ્રેડર્સમાંથી પણ 400 કિલોથી વધુ પ્રતિબંધિત પ્લાસ્ટિકનો જથ્થો પકડાયો હતો. આ ત્રણેય વેપારીઓ પાસેથી મહાનગરપાલિકાએ કુલ 50,000 રૂપિયાનો દંડ વસૂલ કર્યો છે.