ભરૂચ રૂરલ પોલીસ સ્ટેશનમાં નોંધાયેલા ગુનામાં છેલ્લા એક વર્ષથી નાસતા ફરતા આરોપીને અમદાવાદ ગ્રામ્ય SOG (સ્પેશિયલ ઓપરેશન ગ્રુપ) દ્વારા ઝડપી પાડવામાં આવ્યો છે. આ સફળ કામગીરીથી પોલીસને મોટી સફળતા મળી છે. અમદાવાદ રેન્જના પોલીસ મહાનિરીક્ષક શ્રી રાઘવેન્દ્ર વત્સ અને અમદાવાદ ગ્રામ્યના પોલીસ અધિક્ષક શ્રી ઓમ પ્રકાશ જાટના માર્ગદર્શન હેઠળ જિલ્લામાં નાસતા ફરતા આરોપીઓને પકડવા માટે એક ખાસ ડ્રાઇવ હાથ ધરવામાં આવી હતી. આ ડ્રાઇવના અનુસંધાને SOG પોલીસ ઇન્સ્પેક્ટર એસ.એન. રામાણીના નેતૃત્વ હેઠળ એક ટીમ કાર્યરત હતી.
આ કાર્યવાહી દરમિયાન, SOGના એ.એસ.આઈ. ભરતસિંહ ખુમાનસિંહ અને અ.હે.કો. મહાવીરસિંહ હેમંતસિંહને ખાનગી બાતમી મળી હતી. તેમને માહિતી મળી કે ભરૂચ તાલુકા પોલીસ સ્ટેશનના ગુનામાં વોન્ટેડ આરોપી નદીમઅહેમદ ઉર્ફે બંટો નીહાલઅહેમદ શેખ (રહે. ઉર્વા પાર્ક, ફતેવાડી કેનાલ, અમદાવાદ) મલાવ તળાવ વિસ્તારમાં હાજર છે. બાતમીના આધારે પોલીસે તાત્કાલિક કાર્યવાહી કરી આરોપી નદીમઅહેમદ શેખને ઝડપી પાડ્યો હતો. ત્યારબાદ તેને ધોળકા ટાઉન પોલીસ સ્ટેશન ખાતે સોંપીને આગળની કાનૂની કાર્યવાહી હાથ ધરવામાં આવી છે.