વડોદરા શહેરના સમા વિસ્તારમાં આજે બપોરના સમયે એક ચોંકાવનારી લૂંટની ઘટના સામે આવી છે. મોઢા પર રૂમાલ બાંધીને આવેલા બે અજાણ્યા લૂંટારાઓએ ઘરમાં આરામ કરતા વૃદ્ધ દંપતિને મતદાન મુદ્દે ધમકાવી ગળું દબાવી તથા ચાકુ બતાવી સોના-ચાંદીના દાગીના અને રોકડ રકમ લૂંટી લીધી હતી. વડોદરા શહેરના સમા વિસ્તારમાં આવેલી સંતોષીનગર સોસાયટીમાં બપોરના સમયે વૃદ્ધ દંપતિ પોતાના ઘરે આરામ કરી રહ્યું હતું ત્યારે બે શખ્સો મોઢા પર રૂમાલ બાંધીને ઘરમાં ઘૂસી આવ્યા હતા. લૂંટારાઓએ “તમે ચૂંટણીમાં મતદાન કેમ નથી કર્યું?” કહીને દંપતિને ધમકાવવાનું શરૂ કર્યું હતું. દંપતિ કઈ સમજ્યા પહેલા જ લૂંટારાઓએ ગળું દબાવી તથા ચાકુ બતાવી ડરાવ્યા હતા.
ત્યારબાદ ઘરમાં રહેલી તિજોરીમાંથી સોનાના દાગીના અને રોકડ રકમ લૂંટી બંને આરોપીઓ ફરાર થઈ ગયા હતા. ઘટના બાદ વૃદ્ધ દંપતિએ પડોશીઓની મદદ લીધી અને પોલીસને જાણ કરી હતી. ફતેગંજ પોલીસ સ્ટેશનના પીઆઇ સહિતનો સ્ટાફ તાત્કાલિક સ્થળ પર દોડી આવ્યો હતો અને સમગ્ર મામલે તપાસ હાથ ધરી છે. પોલીસ દ્વારા આસપાસના સીસીટીવી ફૂટેજ ચકાસી લૂંટારાઓને ઝડપી પાડવા માટે પ્રયાસો શરૂ કરવામાં આવ્યા છે.