બિહાર પોલીસે જણાવ્યું હતું કે, સવારના સમયે સમસ્તીપુર જિલ્લામાં ગંગા નદીમાં પ્રવાહમાં ૧૪ મુસાફરોને લઈ જતી હોડી પલટી જતાં ઓછામાં ઓછા ત્રણ લોકોના મોત થયા હતા અને ચાર અન્ય ગુમ થયા હતા.
આ દૂરઘટના સવારે ૫.૪૫ વાગ્યાની આસપાસ બની હતી અને બચાવ ટીમોએ જણાવ્યું હતું કે સાત મુસાફરોને બચાવી લેવામાં આવ્યા હતા, જ્યારે ગુમ થયેલા લોકો માટે શોધ કામગીરી મોડી સાંજ સુધી ચાલુ રહી હતી.
“અત્યાર સુધી ત્રણ લોકોના મોતની પુષ્ટિ થઈ છે અને ચાર લોકો હજુ પણ ગુમ છે,” મોહીઉદ્દીન નગર સર્કલ ઓફિસર બ્રિજેશ કુમાર દ્વિવેદીએ જણાવ્યું હતું કે મૃતકોમાં એક મહિલાનો પણ સમાવેશ થાય છે.
જિલ્લા વહીવટીતંત્રના જણાવ્યા અનુસાર, પટણા જિલ્લાના બાર પોલીસ સ્ટેશન હેઠળના માસૂમગંજ બિંદ ટોલીના રહેવાસી, ૧૪ મુસાફરો, ખેતીકામ માટે મોહીઉદ્દીન નગરના સુલતાનપુર ડાયરા જઈ રહ્યા હતા અને પરવલ ખેતરોમાંથી શાકભાજી લઈને ઉમાનાથ ઘાટ પરત ફરી રહ્યા હતા ત્યારે અકસ્માત થયો હતો.
પટણા જિલ્લા મેજિસ્ટ્રેટ એસએમ થિયાગરાજને જણાવ્યું હતું કે ૧૪ લોકોને લઈને જતી હોડી ભારે પવનને કારણે પલટી ગઈ હતી અને ઉમેર્યું હતું કે સમસ્તીપુર અને પટણા જિલ્લા વહીવટીતંત્રની ટીમો સંયુક્ત રીતે બચાવ કામગીરી કરી રહી છે.