ભાવનગર શહેરના ભરતનગર પોલીસ મથકના સ્ટાફે ગતરોજ પેટ્રોલિંગ દરમિયાન મળેલી ચોક્કસ બાતમીના આધારે તરસમિયા વિસ્તારમાં આવેલી સિદ્ધિવિનાયક સોસાયટી પ્રધાનમંત્રી આવાસ યોજના પાસે રેડ કરી હતી. આ કામગીરી દરમિયાન પોલીસે ખુલ્લી જગ્યામાં ગેરકાયદેસર રીતે વિદેશી દારૂનું વેચાણ કરતા બે શખ્સોને રૂ. 27,520ની કિંમતની કુલ 182 બોટલ સાથે રંગેહાથ ઝડપી લીધા હતા. કાયદાકીય પ્રક્રિયાના ભાગરૂપે પોલીસે બંને આરોપીઓ વિરુદ્ધ ગુનો નોંધી આગળની કાયદેસરની કાર્યવાહી હાથ ધરી છે.
ઇંગ્લીશ દારૂના જથ્થા સાથે બે બુટલેગરો ઝડપાયા ભરતનગર પોલીસ સ્ટેશનનો સ્ટાફ જ્યારે અલગ-અલગ વિસ્તારોમાં કાયદો અને વ્યવસ્થાની જાળવણી માટે પેટ્રોલિંગમાં હતો, તે દરમિયાન તેમને તરસમિયા વિસ્તારમાં દારૂના વેચાણ અંગેની સચોટ માહિતી મળી હતી. આ માહિતીના આધારે પોલીસે તાત્કાલિક પ્રધાનમંત્રી આવાસ યોજના પાસે, ખોડીયાર પ્રોવિઝનની બાજુમાં આવેલી ખુલ્લી જગ્યામાં દરોડો પાડ્યો હતો.
પોલીસની આ રેડ દરમિયાન સ્થળ પરથી ગેરકાયદે દારૂનો વેપાર કરી રહેલા પરેશ રમેશભાઈ દિહોરા (ઉં.વ. 23, રહે. ભાવનગર) અને અભય તુલસીભાઈ બારૈયા (ઉં.વ. 22, રહે. ભાવનગર) નામના બે બુટલેગરો ઝડપાયા હતાં.
27 હજારથી વધુની કિંમતની 182 બોટલ જપ્ત પોલીસે આ બંને શખ્સોની હાજરીમાં સ્થળ પર રાખેલી પ્લાસ્ટિકની થેલીઓમાંથી અલગ-અલગ બ્રાન્ડની નાની-મોટી કુલ 182 નંગ ઇંગ્લિશ દારૂની બોટલો જપ્ત કરી હતી, જેની અંદાજિત કિંમત રૂ. 27,520 થાય છે. પોલીસે પ્રતિબંધિત દારૂનો આ જથ્થો કબ્જે કરીને બંને આરોપીઓની અટકાયત કરી લીધી છે.