જામનગરમાં સતત છઠ્ઠા દિવસે પણ તિવ્ર ઠંડીથી જનજીવને રાહત અનુભવી હતી. જોકે, ભેજના ઉંચા પ્રમાણના કારણે સવારે ગાઢ ધુમ્મસનું આવરણ છવાયુ હતું. બીજી બાજુ સોમવારે બર્ફિલા પવનનો વેગ પણ ઘટી ૧૦થી ૨૦ કિ.મિ.સરેરાશ રહ્યો હતો. જોકે, મોડીસાંજથી સવાર સુધી વાતાવરણમાં ટાઢોડુ મહદઅંશે જળવાયેલુ રહયુ હતું. જામનગરમાં ગત ગુરૂવારથી ઠંડીનું જોર ક્રમશ: વધ્યું હતુ અને લઘુતમ તાપમાન ઉતરોતર ઉંચકાત કડકડતી ઠંડીથી લોકોએ રાહતનો અનુભવ કર્યો હતો. જામનગરમાં સોમવારે લઘુતમ તાપમાનનો પારો ૧૪ ડીગ્રી પર સ્થિર થયો હતો.
જેથી તિવ્ર ઠંડીનું જોર ઘટ્યુ હતું. જોકે, ભેજનું પ્રમાણ આંશિક વધતા સવારે ધુમ્મસનુ ગાઢ આવરણ છવાયુ હતું. ખાસ કરીને શહેરને જોડતા ઘોરીમાર્ગો પર વહેલી સવારે આવા ગમન કરતા વાહન ચાલકોએ મુશ્કેલીનો સામનો કર્યો હતો. જામનગરમાં બર્ફિલા પવનનો વેગ પણ ઘટ્યો હતો અને સરેરાશ દશથી વીશ કિ.મિની ઝડપે પવન ફૂંકાયો હતો. સતત બે દિવસ સુધી વીશથી ત્રીસ કિ.મિ.ની ઝડપે ફૂંકાયેલા વેગીલા વાયરાની ઝડપ ઘટતા રાહદારી અને વાહનચાલકોએ રાહત અનુભવી હતી. જામનગરમાં બપોરે માહોલ હુંફાળો રહ્યો હતો.