દુબઈ
ભારતની સ્ટાર ઓપનર સ્મૃતિ મંધાનાએ ઈંગ્લેન્ડ સામેની શ્રેણીમાં કરેલા શાનદાર દેખાવને પગલે તે આઈસીસી વિમેન્સ રેન્કિંગની નવી યાદીમાં ટી૨૦માં કારકિર્દીના સર્વોચ્ચ બીજા ક્રમે પહોંચી ગઈ છે. આ ઉપરાંત મંધાના વન-ડે રેન્કિંગમાં સાતમાં ક્રમે પહોંચી હતી. ભારતીય વિમેન્સ ટીમની ડાબોડી બેટરે ઈંગ્લેન્ડ સામેની ત્રણ ટી૨૦ આંતરાષ્ટ્રીય મેચમાં સરેરાશ ૧૧૧ રન કર્યા હતા. આ દમદાર દેખાવની મદદથી તેના ક્રમાંકમાં બે સ્થાનનો ફાયદો થયો હતો. વન-ડેમાં ભારતની પૂર્વ નંબર વન બેટ્સમેન મંધાનાએ ઈંગ્લેન્ડ સામેની પ્રથમ વન-ડેમાં ૯૧ રનની મેચ વિનિંગ ઈનિંગ રમતા તેને વન-ડે બેટરના ક્રમાંકમાં ત્રણ સ્થાનનો લાભ થયો હતો. અન્ય ભારતીય બેટ્સમેન જેના વન-ડે ક્રમાંકમાં સુધારો થયો તેમાં હરમનપ્રીત કૌર અને દીપ્તિ શર્માનો સમાવેશ થાય છે. કેપ્ટન કૌર ચાર સ્થાન આગળ વધીને નવમાં ક્રમે રહી હતી જ્યારે દીપ્તિ એક સ્થાનની આગેકૂચ સાથે ૩૨માં ક્રમે પહોંચી હતી. યાસ્તિકા ભાટિયા આઠ સ્થાનના સુધારા સાથે ૩૭માં ક્રમે પહોંચી હતી. બીજીતરફ બોલર્સની યાદીમાં દીપ્તિ શર્મા છ સ્થાનની છલાંગ સાથે ૧૨માં ક્રમે શ્રેષ્ઠ બોલર રહી હતી. ઈંગ્લેન્ડની ખેલાડી એમ્મા લેમ્બ અને સોફી એક્લેસ્ટન બન્ને ત્રણ સ્થાનના સુધારા સાથે અનુક્રમે ૬૪ અને ૭૨માં ક્રમે રહ્યા હતા. જ્યારે ચાર્લી ડીન આ યાદીમાં ૮૬માં ક્રમે હતી. ડીન બોલર્સના રેન્કિંગમાં ૨૦માં ક્રમે અને કેટ ક્રોસ ટોપ ટેનમાં રહી હતી. ટી૨૦ રેન્કિંગમાં હરમનપ્રીત બેટર્સની યાદીમાં એક સ્થાન આગળ વધીને ૧૪માં ક્રમે જ્યારે બોલર્સની યાદીમાં રેણુકા સિંઘ ત્રણ ક્રમના સુધારા સાથે ૧૦માં અને રાધા યાદવ ચાર સ્થાનના લાભ સાથે ૧૪માં ક્રમે રહી હતી. ઓલરાઉન્ડર્સની યાદીમાં ભારતીય પ્લેયર સ્નેહ રાણા અને પૂજા વસ્ત્રાકર સંયુક્ત રીતે ૪૧માં ક્રમે રહ્યા હતા.
