મોહાલી
વર્તમાન ટી૨૦ ચેમ્પિયન ટીમ ઓસ્ટ્રેલિયાએ મોહાલીમાં રમાયેલી પ્રથમ ટી૨૦ મેચમાં ભારતને ચાર વિકેટે પછડાટ આપીને સિરીઝમાં ૧-૦ની લીડ મેળવી લીધી છે. ભારતીય ટીમ માટે તેની કંગાળ બોલિંગ નબળું પાસું રહ્યું હતું જેને પગલે ભારતીય બેટ્સમેનો ખાસ કરીને હાર્દિક પંડ્યા (૭૧*)ની મહેનત એળે ગઈ હતી. ભારતીય ટીમે નિર્ધારિત ઓવરમાં છ વિકેટે ૨૦૮ રન કર્યા હતા. ભારતીય ટીમમાં ઝડપી બોલર જસપ્રીત બુમરાહને અંતિમ ઈલેવનમાં સામેલ કરાયો નહતો અને તેની ખોટ વર્તાઈ હતી. ભુવનેશ્વર, ઉમેશ તેમજ હર્ષલની ઓસ્ટ્રેલિયન બેટ્સમેનોએ જાેરદાર ધોલાઈ કરતા ચાર બોલ બાકી હતા ત્યારે ટી૨૦માં બીજાે સર્વોચ્ચ લક્ષ્યાંક પાર કરી લીધો હતો. ભારતીય બોલર્સે કંગાળ બોલિંગ પ્રદર્શન કર્યું હતું અને ડેથ ઓવર્સમાં ખોબલા મોઢે રન આપ્યા હતા. આ ઉપરાંત ફિલ્ડર્સે પણ કેટલાક કેચ છોડ્યા હતા જે ભારતના પરાજયનું કારણ રહ્યું હતું. હર્ષલ પટેલે ૧૮મી ઓવરમાં ૨૨ રન તેમજ ભુવનેશ્વર કુમારે ૧૯મી ઓવરમાં ૧૬ રન આપતા કાંગારૂ ટીમે બાજી પલટી નાંખી હતી. ઓસ્ટ્રેલિયન ટીમનો ટી૨૦માં આ બીજાે સૌથી સફળ રનચેઝ રહ્યો છે. અગાઉ ઓકલેન્ડ ખાતે ન્યૂઝીલેન્ડ સામે ઓસિ.એ પાંચ વિકેટ ૨૪૫ રનનો સર્વોચ્ચ રન ચેઝનો રેકોર્ડ નોંધાવ્યો હતો. ઓસ્ટ્રેલિયાએ કેપ્ટન એરોન ફિન્ચ (૨૨)ની વહેલી વિકેટ ગુમાવી હોવા છતાં મજબૂત શરૂઆત કરી હતી અને ઓપનર કેમરૂન ગ્રીને ૬૧ રન તથા સ્મિથે ૩૫ રન કરતા બીજી વિકેટ માટે ૭૦ રનની મહત્વપૂર્ણ ભાગીદારી કરી હતી. ઉમેશ યાદવે તેના ક્વોટાની બીજી ઓવરમાં સ્મિથ અને મેક્સવેલ (૧)ની વિકેટ ઝડપતા મેચમાં રોમાંચક વળાંક આવ્યો હતો. ગુજ્જુ બોલર અક્ષર પટેલે સેટ બેટ્સમેન ઈંગ્લિસને (૧૭)ને બોલ્ડ કરી પેવેલિયન મોકલ્યો હતો ત્યાં સુધી મેચમાં ભારતની પકડ જણાતી હતી પરંતુ ત્યારબાદ ટીમ ડેવિડ (૧૮) અને મેથ્યુ વેડે ૪૫ રનની અણનમ ઈનિંગ રમીને મેચનું પાસું પલટી નાંખ્યું હતું. ચહલે અંતિમ ઓવરના પ્રથમ બોલ પર ટીમ ડેવિડની વિકેટ મેળવી હતી પરંતુ ત્યાં સુધીમાં મોડું થઈ ગયું હતું. ઓસ્ટ્રેલિયન બેટ્સમેનોએ અંતિમ ત્રણ ઓવરમાં ૪૦ રન ઝૂડ્યા હતા. ભારત તરફથી અક્ષર પટેલે ત્રણ વિકેટ ઉમેશે બે અને ચહલે એક વિકેટ ઝડપી હતી. ઓસ્ટ્રેલિયાએ ટોસ જીતીને પ્રથમ ફિલ્ડિંગનો ર્નિણય લીધો હતો. ભારત તરફથી નિયમિત ઓપનર રાહુલે કેપ્ટન રોહિત સાથે ઓપનિંગ કરી હતી. રોહિત શર્મા (૧૧) વધુ એક વખત ઉતાવળિયો શોટ રમવા જતા સસ્તામાં આઉટ થઈ ગયો હતો. સ્ટાઈલિશ બેટ્સમેન લોકેશ રાહુલે ૫૫ રનની ઈનિંગ રમી હતી જેમાં ચાર ચોગ્ગા અને ત્રણ છગ્ગા ફટકાર્યા હતા. વિરાટ કોહલી (૨) વધુ એક વખત ફ્લોપ સાબિત થયો હતો. સુર્યકુમાર યાદવે તેની ક્ષમતાને પુરવાર કરી હતી અને ૨૫ બોલમાં ૪૬ રન ફટકારીને તેની ટી૨૦ વર્લ્ડ કપ ટીમમાં પસંદગીને સાર્થક કરી હતી. હાર્કિદ પંડ્યાએ સાત ચોગ્ગા અને પાંચ છગ્ગા સાથે ૭૧ રનની અણનમ ઈનિંગ રમીને ભારતનો સ્કોર ૨૦૦ રનને પાર પહોંચાડ્યો હતો. હાર્દિકે ગ્રીનની છેલ્લી ઓવરના અંતિમ ત્રણ બોલમાં લાગલગાટ છગ્ગા ફટકાર્યા હતા. ભારતને નિયમિત અંતરે વિકેટો ગુમાવવી ભારે પડી હતી. અક્ષર અને કાર્તિક છ-છ રન કરી પેવેલિયન પરત ફર્યા હતા જ્યારે હર્ષલ પટેલ સાત રન કરી નોટ આઉટ રહ્યો હતો. ઓસ્ટ્રેલિયા તરફથી ઈલિસે સૌથી વધુ ત્રણ વિકેટ ઝડપી હતી જ્યારે હેઝલવુડે બે અને ગ્રીને એક વિકેટ ઝડપી હતી. ભારત અને ઓસ્ટ્રેલિયાની ટી૨૦ શ્રેણીની બીજી મેચ નાગપુરમાં શુક્રવારે રમાશે.
