નરેન્દ્ર મોદી શુક્રવારે સતત ત્રીજી વખત નેશનલ ડેમોક્રેટિક એલાયન્સ (NDA) સંસદીય દળના નેતા તરીકે ચૂંટાયા હતા. જૂની સંસદ (બંધારણ ગૃહ)ના સેન્ટ્રલ હોલમાં સવારે 11 વાગ્યે શરૂ થયેલી બેઠકમાં 13 NDA પક્ષોના નેતાઓએ હાજરી આપી હતી.
બેઠકમાં NDAના તમામ 293 સાંસદો, રાજ્યસભાના સાંસદો અને તમામ રાજ્યોના મુખ્યમંત્રીઓ અને નાયબ મુખ્યમંત્રીઓ હાજર રહ્યા હતા. આ પછી NDAએ બપોરે 3 વાગ્યે સરકાર બનાવવાનો દાવો કર્યો. ગઠબંધનના નેતાઓએ રાષ્ટ્રપતિ દ્રૌપદી મુર્મુને સમર્થનનો પત્ર સોંપ્યો.
બેઠક બાદ મોદી ભાજપના વરિષ્ઠ નેતાઓ લાલકૃષ્ણ અડવાણી, મુરલી મનોહર જોશી અને પૂર્વ રાષ્ટ્રપતિ રામનાથ કોવિંદને તેમના ઘરે મળ્યા હતા. આ પછી પીએમ સાંજે 6 વાગ્યે રાષ્ટ્રપતિ દ્રૌપદી મુર્મુને મળવા પહોંચ્યા. રાષ્ટ્રપતિએ તેમને સરકાર બનાવવા માટે આમંત્રણ આપ્યું.
ભાજપ અધ્યક્ષ જેપી નડ્ડાએ સ્વાગત પ્રવચન કર્યું હતું. રાજનાથ સિંહે વડાપ્રધાન પદ માટે નરેન્દ્ર મોદીના નામનો પ્રસ્તાવ મૂક્યો હતો. અમિત શાહે તેને ટેકો આપ્યો અને નીતિન ગડકરીએ મંજૂરી આપી. જેડીએસ પ્રમુખ કુમારસ્વામીએ પ્રસ્તાવને ટેકો આપ્યો હતો.
આ પછી TDP ચીફ ચંદ્રબાબુ નાયડુ, JDU ચીફ અને બિહારના સીએમ નીતિશ કુમારે સમર્થન જાહેર કર્યું હતું. મોદી 9 જૂને સાંજે 6 વાગ્યે રાષ્ટ્રપતિ ભવનમાં ત્રીજી વખત વડાપ્રધાન તરીકે શપથ લઈ શકે છે. સમાચાર છે કે મોદીની સાથે સમગ્ર કેબિનેટ શપથ લઈ શકે છે.