પાટણ શહેરમાં નગરપાલિકાના સિટી મેનેજર અભિષેક પટેલે એક અનોખી પહેલ કરી છે. તેમણે વેસ્ટ ટુ વન્ડર પ્રોજેક્ટ અંતર્ગત જૂના ટાયરોમાંથી બાળકો અને વૃદ્ધો માટે ઉપયોગી 16 જેટલી વસ્તુઓ બનાવી છે. આ પ્રોજેક્ટ અધારા દરવાજા બહારના બગીચા અને આનંદ સરોવર બગીચામાં અમલમાં મૂકવામાં આવ્યો છે.
અભિષેક પટેલે પોતાની નિયમિત કામગીરી ઉપરાંત સાંજે અને મોડી રાત સુધી, તેમજ શનિ-રવિએ પણ આ પ્રોજેક્ટ પર કામ કર્યું છે. તેમણે 50 જૂના ટાયરોમાંથી 8 ટૂલ, બે બેન્ચ, બે ગાડી, બે જિરાફ અને બે કેટલી જેવી વસ્તુઓ બનાવી છે. આ સમગ્ર પ્રોજેક્ટનો ખર્ચ માત્ર રૂ. 5000 જેટલો આવ્યો છે, જે નગરપાલિકા દ્વારા ભોગવવામાં આવ્યો છે.
આ પ્રોજેક્ટની ખાસ વાત એ છે કે સિટી મેનેજરે આ વધારાની કામગીરી માટે કોઈ વળતર લીધું નથી. તેમણે નગરપાલિકાના ચીફ ઓફિસરની મંજૂરી લઈને આ પ્રોજેક્ટ શરૂ કર્યો હતો. આજે આ બંને બગીચાઓ બાળકો અને વૃદ્ધો માટે આકર્ષણનું કેન્દ્ર બન્યા છે. આ પહેલ કચરામાંથી કંચન બનાવવાનું ઉત્તમ ઉદાહરણ બની રહી છે.
