સ્વામિનારાયણ સંપ્રદાયના તીર્થધામ વડતાલમાં આગામી 2 ફેબ્રુઆરીના રોજ રવિવારે 199 મી શિક્ષાપત્રી જયંતિ મહોત્સવની ભવ્ય ઉજવણી કરવામાં આવશે. સવારે 8થી 12 કલાક દરમિયાન યોજાનાર આ મહોત્સવમાં 97મી રવિસભા અને શિક્ષાપત્રી હોમાત્મક યજ્ઞનું આયોજન કરવામાં આવ્યું છે.
કાર્યક્રમમાં સત્સંગ મહાસભાના પ્રમુખ નૌત્તમપ્રકાશદાસ કથાવાર્તા કરશે. આ દિવસે સદ્દગુરુ બ્રહ્માનંદ સ્વામીનો 253મો અને સદગુરુ નિષ્કુળાનંદસ્વામીનો 259મો પ્રાગટ્ય દિન પણ ઉજવાશે. વસંતપંચમીના દિવસે યોજાતો યજ્ઞ છેલ્લા 40 વર્ષથી ઉમરેઠના હાઇકોર્ટ ન્યાયાધિશ એ.એલ.દવેના પરિવાર દ્વારા કરવામાં આવે છે.
વડતાલ મંદિરના કોઠારી ડો.સંતવલ્લભસ્વામીના જણાવ્યાનુસાર, ભગવાન સ્વામિનારાયણે સંવત 1882 ના મહાસુદી પંચમીના દિવસે વડતાલ મંદિરના હરિમંડપમાં શિક્ષાપત્રીની રચના કરી હતી.
શિક્ષાપત્રીમાં સામાન્ય સત્સંગીઓથી માંડીને આચાર્ય મહારાજ, ગૃહસ્થો, સધવા-વિધવા સ્ત્રીઓ, બ્રહ્મચારીઓ અને રાજાઓ માટેના વિશેષ ધર્મનું વિસ્તૃત વર્ણન કરવામાં આવ્યું છે.
ભગવાન સ્વામિનારાયણે તેમના અનુયાયીઓને શિક્ષાપત્રીના નિયમોનું કાળજીપૂર્વક પાલન કરવાનો આદેશ આપ્યો હતો, જેનાથી આ લોક અને પરલોક બંનેમાં સુખની પ્રાપ્તિ થાય છે.