વડતાલ સ્વામિનારાયણ મંદિરમાં આજે શનિવારે પ્રખ્યાત ભાગવત કથાકાર રમેશ ઓઝાએ વિશેષ મુલાકાત લીધી હતી. તેમણે મંદિરમાં શ્રી લક્ષ્મીનારાયણદેવ, રણછોડરાય, ધર્મભક્તિ વાસુદેવ અને હરિકૃષ્ણ મહારાજ રાધાકૃષ્ણ દેવના દર્શન કર્યા હતા.
વડતાલ ધામના મુખ્ય સંતો જેમાં SGVP-છારોડીના માધવપ્રિયદાસજી સ્વામી, મેમનગરના બાલકૃષ્ણદાસજી સ્વામી, વડતાલ ધામના ચેરમેન દેવપ્રકાશદાસજી સ્વામી, મુખ્ય કોઠારી ડો.સંતવલ્લભદાસજી સ્વામી અને સત્સંગ મહાસભા પ્રમુખ નૌત્તમપ્રકાશદાસજી સ્વામી સહિત અન્ય સંતોએ તેમનું ભવ્ય સ્વાગત કર્યું હતું.
મંદિરના બ્રહ્મચારી હરિસ્વરૂપાનંદે રમેશ ઓઝાને પ્રસાદીની પુષ્પમાળા, કંઠી અને શાલથી સન્માનિત કર્યા હતા. ત્યારબાદ તેમણે મંદિર પરિસરમાં આવેલા પ્રસાદીની વસ્તુઓ, હરિ મંડપ, સભા મંડપ અને ગોપાળાનંદ સ્વામીના આશ્રમની મુલાકાત લીધી હતી. વિશેષમાં, તેમણે નૂતન અક્ષર ભુવનનું શિલાપૂજન પણ કર્યું હતું, જેમાં મેતપુરના હરીઓમ સ્વામી અને ગોવિંદસ્વામી પણ ઉપસ્થિત રહ્યા હતા.
