ઠાસરા ખાતે કાર્યરત ધી ઠાસરા ટીચર્સ કો.ઓ. ક્રેડિટ સોસાયટી લી. માં મોટી નાણાંકીય ગેરરીતિનો મામલો ઉજાગર થયો છે.
સોસાયટીના પૂર્વ પ્રમુખ, પૂર્વ મંત્રી અને કોમ્પ્યુટર ક્લાર્કે ભેગા મળીને સોસાયટીમાથી કુલ રૂપિયા 2.12 કરોડો રૂપિયાની ઉચાપત આચરી ક્રેડિટ સોસાયટીને આર્થિક રીતે નુકશાન પહોંચાડ્યું છે.
ક્રેડિટ સોસાયટીના 31 સભાસદોની જાણ બહાર લોન ઉધારી કરી નાણાકીય કૌભાંડ આચરવામા આવ્યું છે.
જિલ્લા રજીસ્ટ્રાર દ્વારા પોલીસ ફરિયાદ કરવા હુકમ કરાતા ઠાસરા પોલીસ મથકે સમગ્ર મામલે ફરિયાદ નોંધાઈ છે.
ઠાસરા ખાતે ધી ઠાસરા ટીચર્સ કો.ઓ. ક્રેડિટ સોસાયટી લી. આવેલ છે. જેમાં હાલમાં ગળતેશ્વર અને ઠાસરા તાલુકાના કુલ 1148 સભાસદો છે.
આ ક્રેડિટ સોસાયટીમાં 2 એપ્રિલ 2012થી 16 જાન્યુઆરી 2022 સુધી સોસાયટીના મંત્રી તરીકે અજીતસિંહ રાવસિહ ઝાલા (રહે.ઉત્તરસંડા, નડિયાદ), પ્રમુખ તરીકે ગોકળભાઈ હેમાભાઈ ઠાકોર (રહે.અંબાવ, ગળતેશ્વર), (10 ઓગસ્ટ 2010થી 16 જાન્યુઆરી 2022) સુધી ફરજ બજાવતા હતા.
આ ઉપરાંત આ સમય દરમિયાન કોમ્પ્યુટર ક્લાર્ક તરીકે પંકજ દેસાઈભાઈ પરમાર (રહે.ઠાસરા) પણ ફરજ બજાવતા હતા.
ક્રેડિટ સોસાયટીના આ બંને ભૂતપૂર્વ મંત્રી અને પ્રમુખે તેમજ કોમ્પ્યુટર ક્લાર્કે સોસાયટીને આર્થિક નુકસાન પહોચાડવાના હેતુસર ક્રેડિટ સોસાયટીમાંથી મોટી રકમનો ગફલો કર્યો હતો.
31 જેટલા સભાસદોના ખાતેદારોની જાણ બહાર આ ત્રીપુટીએ પોતાના કાર્યકાળ દરમિયાન ગેરકાયદે લોન ઉધારી નાણાકીય ગેરરીતિ આચરી કૌભાંડ આચર્યું હતું. આ ક્રેડિટ સોસાયટીમાથી કુલ રૂપિયા 2 કરોડ 12 લાખ 69 હજાર 240 અંગત કામે વાપરી દીધા હતા.
સમગ્ર મામલો વર્ષ 2022મા નવા પ્રમુખ સતીષભાઈ પટેલ બન્યા તે બાદ તેમણે કારકુનને નિયમીત લોન કપાતના હપ્તા કાપવાનું કહેતાં કારકુને હપ્તા કાપેલા જેથી ગેરકાયદેસર લોનો ઉધારેલી હોવાનુ જાણવા મળ્યુ હતું.
જેથી સભાસદ શિક્ષકોએ હોબાળો કરતાં ક્રેડિટ સોસાયટીના પ્રમુખ સતીષભાઈ પટેલે વર્ષ 2022ની સાલમાં જિલ્લા રજિસ્ટ્રાર ખાતે છેતરપિંડી થઈ હોવાની અરજી કરી હતી.
જે બાદ તપાસ અધિકારીઓ નિમાયા હતા અને આ તપાસનો રિપોર્ટ આપ્યો હતો. જેમાં ઠાસરા તાલુકા પ્રાથમીક ટીચર્સ ક્રેડીટ કો.ઓ. લી. સોસાયટી લી મીટેડ મંડળીમાં કુલ 31 શિક્ષકોના ખાતામાં માજી પ્રમુખ ગોકળભાઈ તથા માજી મંત્રી અજીતસિંહ તથા ક્લાર્ક પંકજભાઈ નાઓએ સભાસદોની જાણ બહાર ગેરકાયદેસર લોનો ઉધરાવી, નાણાકીય ગેરરીતીઓ આચરી ઉપરોક્ત કરોડો રૂપિયાનુ કૌભાંડ આચર્યું હોવાનું બહાર આવ્યું હતું.
આ 31 પૈકી 5 ખાતેદારોએ પોતાના ખાતામાંથી ખોટી રીતે લોન ઉધારેલ હોવાની લેખિત ફરિયાદ ધી ઠાસરા ટીચર્સ કો.ઓ. ક્રેડિટ સોસાયટી લી. માં કરી હતી.
જે બાદ જિલ્લા રજિસ્ટ્રાર કચેરી દ્વારા આ બાબતે પોલીસ ફરિયાદ કરવા લેખિત હુકમ કરવામાં આવતા આ ક્રેડિટ સોસાયટીના વર્તમાન મંત્રી ચંદ્રકાંતભાઈ વાણંદે ઠાસરા પોલીસ મથકે ઉચાપત આચરનાય પૂર્વ મંત્રી, પૂર્વ પ્રમુખ અને કોમ્પ્યુટર ક્લાર્ક વિરુદ્ધ ફરિયાદ નોંધાવી છે. પોલીસે ગુનો નોંધી કાયદેસરની કાર્યવાહી હાથ ધરી છે.