ખેડા જિલ્લામાં તાજેતરમાં થયેલા ભારે વરસાદને કારણે અનેક મુખ્ય માર્ગોને નુકસાન થયું હતું.
માર્ગ અને મકાન પંચાયત વિભાગે આ સ્થિતિને ધ્યાનમાં લઈને તાત્કાલિક પગલાં લીધા છે.
વિભાગે નુકસાન પામેલા મહત્વના માર્ગોનું સમારકામ શરૂ કર્યું છે.
કઠલાલ વિસ્તારમાં ભાનેર એપ્રોચ રોડ, અરાલથી નવી અરાલ રોડ અને સરખેજ એપ્રોચ રોડનું સમારકામ પૂર્ણ કરવામાં આવ્યું છે.
મહુધા-રુદણ અને સીહુંજ નવચેતન માર્ગ પણ રિપેર કરવામાં આવ્યા છે.
મહેમદાવાદ તાલુકામાં સરસવાણી-રતનપુર માર્ગનું સમારકામ થયું છે.
ખેડા વિસ્તારમાં મોટી કલોલીથી નાની કલોલી સુધીનો રસ્તો દુરસ્ત કરાયો છે.
માતર રતનપુર એપ્રોચ રોડ પણ વાહન વ્યવહાર માટે યોગ્ય બનાવવામાં આવ્યો છે.
ગળતેશ્વર વિસ્તારમાં ડાકોર ચીકારીયા એપ્રોચ રોડ અને પડાલ એપ્રોચ રોડનું સમારકામ પૂર્ણ થયું છે.
ઠાસરા તાલુકામાં પડવાડીયા એપ્રોચ રોડનું કામ પણ પૂર્ણ કરવામાં આવ્યું છે. આ તમામ માર્ગો હવે વાહન વ્યવહાર માટે સુરક્ષિત બનાવવામાં આવ્યા છે.
