વડોદરાના બાજવા અન્ડરપાસ વિસ્તારમાં ચોમાસામાં સર્જાતી પાણી ભરાવાની સમસ્યા અને તેના કારણે ઉદ્ભવતા ટ્રાફિકના જામથી નાગરિકોને મુક્તિ અપાવવા માટે એક મહત્વપૂર્ણ નિર્ણય લેવાયો છે. બાજવા અન્ડરપાસ ઉપર અંદાજે રૂપિયા 80 કરોડના જંગી ખર્ચે રેલવે ઓવર બ્રિજ (ROB) બનાવવાનું આયોજન કરાયું છે. આ પ્રોજેક્ટ પૂર્ણ થવાથી આ સમગ્ર પંથકની કાયાપલટ થઈ જશે અને વાહનવ્યવહાર અત્યંત સરળ બનશે.
ચોમાસા દરમિયાન પાણી ભરાવાની ગંભીર સમસ્યા સામાન્ય રીતે ચોમાસામાં ભારે વરસાદના કારણે બાજવા અન્ડરપાસમાં પાણી ભરાઈ જવાની સમસ્યા વર્ષોથી કમકમાટી ઉપજાવે તેવી રહી છે. પાણી ભરાવાને કારણે આ અન્ડરપાસમાંથી વાહનવ્યવહાર સંપૂર્ણપણે બંધ થઈ જાય છે, જેના પરિણામે હજારો વાહનચાલકો અને સ્થાનિક નાગરિકોને લાંબા રસ્તાઓ કાપવા પડે છે.
સીધી કનેક્ટિવિટી ન રહેવાના કારણે અસંખ્ય લોકો સમયસર પોતાના કાર્યસ્થળે પહોંચી શકતા નથી અને નોકરીયાતો તેમજ વિદ્યાર્થીઓને ભારે હાલાકી ભોગવવી પડે છે. આ ગંભીર સમસ્યાના કાયમી નિરાકરણ રૂપે જ અન્ડરપાસની ઉપર આધુનિક રેલવે ઓવરબ્રિજ બનાવવાની આવશ્યકતા ઊભી થઈ હતી, જે હવે વાસ્તવિકતામાં ફેરવાઈ રહી છે.
ઔધોગિક કનેક્ટિવિટીમાં સુધારો થશે આ નવા ઓવરબ્રિજના નિર્માણથી વડોદરાની દિગ્ગજ ઔદ્યોગિક કંપનીઓ વચ્ચેની કનેક્ટિવિટીમાં ક્રાંતિકારી ફેરફાર આવશે. બાજવા અન્ડરપાસની આસપાસના ભાગમાં ગુજરાત સ્ટેટ ફર્ટિલાઇઝર્સ એન્ડ કેમિકલ્સ (GSFC), ઇન્ડિયન ઓઇલ કોર્પોરેશન (IOCL) રિફાઇનરી, આઈપીસીએલ જેવી વિશ્વકક્ષાની મહત્ત્વપૂર્ણ ઇન્ડસ્ટ્રિયલ કંપનીઓ આવેલી છે.
આ ઉપરાંત, ગોરવા જીઆઈડીસી એસ્ટેટ અને દુમાડ-સમા જેવા ગીચ તથા વિકસતા વિસ્તારોને જોડતી એક સીધી અને અત્યંત સરળ લિંક આ બ્રિજ દ્વારા ઉપસ્થિત થશે. ઉદ્યોગોમાં કામ કરતા હજારો કર્મચારીઓ, ઇજનેરો અને માલસામાનની હેરાફેરી કરતા વાહનો હવે કોઈપણ પ્રકારના ટ્રાફિક કે વિઘ્ન વગર નિર્ભયપણે અવરજવર કરી શકશે.