જામનગરના લાલપુર તાલુકાના પડાણા પાટિયા પાસે આશાપુરા હોટલ નજીક હ્યુન્ડાઈ ક્રેટા કારે પોલીસ કોન્સ્ટેબલ કમલેશભાઈ ગોજિયાને ટક્કર મારી. 20 ઓક્ટોબર, 2026ના રોજ સાંજે 7:45 વાગ્યે બનેલા અકસ્માતમાં તેમના જમણા પગમાં ફ્રેક્ચર થયું.
મેઘપર (પડાણા) પોલીસ સ્ટેશનના કમલેશભાઈ હેડ કોન્સ્ટેબલ કરણભાઈ વસરા સાથે પેટ્રોલિંગમાં હતા. પડાણા પાટિયા સર્કલ પાસે ટ્રાફિક તપાસતી વખતે બેદરકારીથી આવતી કારે તેમને અડફેટે લીધા. કારનું ટાયર જમણા પગ પરથી ફરી વળતાં ગંભીર ઈજા થઈ, કારચાલક ખંભાળિયા તરફ ભાગી ગયો.
ઈજાગ્રસ્ત કમલેશભાઈને 108 એમ્બ્યુલન્સ દ્વારા જામનગરની જી.જી. હોસ્પિટલ લઈ જવાયા. ફલિયા ઓર્થોપેડિક હોસ્પિટલમાં ઓપરેશન કરી સળિયો નાખવામાં આવ્યો. મેઘપર (પડાણા) પોલીસે કારચાલક સામે ગુનો નોંધી તપાસ શરૂ કરી છે.