જામનગરમાં ૐ ટ્રેનિંગ સેન્ટર દ્વારા મનોદિવ્યાંગ બાળકો માટે બાય-બાય નવરાત્રી રાસોત્સવનું આયોજન કરાયું. આ કાર્યક્રમ રણજીતનગર, હિરજી મિસ્ત્રી રોડ પાસે આવેલી પ્રણામી સંપ્રદાયની વાડી ખાતે ૨૨ તારીખે રાત્રે ૮ વાગ્યે યોજાયો. બાળકોએ ઉત્સાહભેર ગરબે ઘૂમી નવરાત્રીની ઉજવણી કરી.
સંસ્થાના સ્થાપક ડિમ્પલબેન મહેતા છેલ્લા ૧૫ વર્ષથી મનોદિવ્યાંગ બાળકો માટે આ વિશેષ નવરાત્રી મહોત્સવ યોજી રહ્યા છે. આ વર્ષે આ આયોજનનું ૧૬મું વર્ષ હતું. તેનો મુખ્ય હેતુ બાળકોમાં આનંદ અને આત્મવિશ્વાસ વધારવાનો છે, જેથી તેઓ સમાજ સાથે જોડાઈ શકે.
આ પ્રસંગે જામનગર-દ્વારકાના સાંસદ પૂનમબેન માડમ ખાસ મહેમાન તરીકે હાજર રહ્યા હતા. તેમણે બાળકો સાથે ગરબે ઘૂમી તેમનો ઉત્સાહ વધાર્યો. ધારાસભ્યો, કોર્પોરેટરો, અધિકારીઓ અને સામાજિક આગેવાનો પણ આ કાર્યક્રમમાં હાજર રહ્યા.