વડોદરાના દુમાડ ચોકડી બ્રિજ નીચે પૂરઝડપે આવેલા એક અજાણ્યા વાહનચાલકે રાહદારીને અડફેટે લેતાં ગંભીર અકસ્માત સર્જાયો હતો. અકસ્માત બાદ વાહનચાલક સ્થળ પરથી વાહન લઈ નાસી છૂટ્યો હતો, જ્યારે માથા તેમજ શરીરે ગંભીર ઇજાઓ પામેલા યુવકનું એસ.એસ.જી. હોસ્પિટલ ખાતે સારવાર દરમિયાન મોત નીપજ્યું હતું.
દુમાડ ચોકડી બ્રિજ નીચે અકસ્માત ગઇકાલે બપોરે આશરે ત્રણ વાગ્યે દુમાડ ચોકડી બ્રિજ નીચે અચાનક ટ્રાફિક જામ થઈ ગયો હતો. ત્યાં ચા-નાસ્તાની લારી ચલાવતા સંચાલકે સ્થળ પર જઈને જોતાં એક અજાણ્યો શખસ રસ્તા પર લોહીલુહાણ હાલતમાં હતો. પૂછપરછ કરતાં ઇજાગ્રસ્તે પોતાનું નામ અમરનાથ ગુલીચંદ કોરી જણાવ્યું હતું, પરંતુ વધુ બોલી શક્યા નહોતા.
માથાના પાછળના ભાગે ગંભીર ઈજા થઈ હતી 35 વર્ષીય અમરનાથને માથાના પાછળના ભાગે, કપાળ, બંને પગે તેમજ જમણી આંખ નીચે ગંભીર ઇજાઓ પહોંચી હતી. સ્થાનિક લોકોએ તાત્કાલિક 108 એમ્બ્યુલન્સ બોલાવી તેમને વડોદરાની એસ.એસ.જી. હોસ્પિટલમાં ખસેડ્યા હતા. જ્યાં સર્જિકલ આઈ.સી.યુ. યુનિટમાં સારવાર દરમિયાન મોત નીપજ્યું હતુ.
મૃતકના વાલી વારસ મળ્યા નહી મૃતક અમરનાથ કોરીના કોઈ વાલી વારસ મળી ન આવતાં ઘટનાના પ્રત્યક્ષદર્શી સ્થાનિક લારીચાલકે સમગ્ર મામલે પોલીસ મથકે ફરિયાદ નોંધાવી છે. પોલીસે ગફલતભરી રીતે વાહન ચલાવી અકસ્માત સર્જી નાસી છૂટનાર અજાણ્યા વાહનચાલક વિરુદ્ધ ગુનો નોંધીને આગળની કાયદેસરની તપાસ હાથ ધરી છે.