લાલપુર તાલુકાના ગજણા ગામે જાહેરમાં જુગાર રમતા બે શખ્સોને પોલીસે ઝડપી પાડ્યા છે. પોલીસે તેમની સામે કાયદેસરની કાર્યવાહી હાથ ધરી છે અને જુગારનો મુદ્દામાલ પણ જપ્ત કર્યો છે. પ્રાપ્ત માહિતી અનુસાર, ગજણા ગામમાં જાહેર સ્થળે કેટલાક ઈસમો જુગાર રમી રહ્યા હોવાની બાતમી લાલપુર પોલીસ સ્ટેશનને મળી હતી. આ બાતમીના આધારે પોલીસે તાત્કાલિક રેડ કરી હતી.
રેડ દરમિયાન, મનજીભાઈ બચુભાઈ પરમાર (ઉં.વ. 30) અને રાજેશભાઈ જેરામભાઈ ડાંગર (ઉં.વ. 32) નામના બે વ્યક્તિઓ ગંજીપત્તાના પાના વડે ‘માંગ પાના’ નામનો જુગાર રમતા રંગેહાથ ઝડપાઈ ગયા હતા. પોલીસે ઝડપાયેલા આરોપીઓ પાસેથી જુગારના મુદ્દામાલ તરીકે રોકડા રૂપિયા 800 અને ગંજીપત્તાના ૫૨ પાના કબજે કર્યા હતા. જપ્ત કરાયેલા મુદ્દામાલની કુલ કિંમત રૂપિયા 800 આંકવામાં આવી છે.