સાઉદી અરેબિયામાં બદલાતી પરિસ્થિતિને ધ્યાનમાં રાખીને, એર ઈન્ડિયાએ ૧૭ ઓક્ટોબર, ૨૦૨૬ સુધી રિયાધ, દમ્મામ અને જેદ્દાહ આવતી-જતી તમામ ફ્લાઈટ્સ રદ કરી છે.
એરલાઈને જણાવ્યું હતું કે તે આ ક્ષેત્રમાં થઈ રહેલા ઘટનાક્રમ પર નજીકથી નજર રાખી રહી છે અને સુરક્ષિત કામગીરી ક્યારે ફરી શરૂ કરી શકાય તે નક્કી કરવા માટે પરિસ્થિતિનું મૂલ્યાંકન કરી રહી છે. તેણે ઉમેર્યું હતું કે ફ્લાઈટ રદ થવાને કારણે અસરગ્રસ્ત મુસાફરોને સંપૂર્ણ રિફંડ આપવામાં આવશે.
“અમે સુરક્ષિત કામગીરી ફરી શરૂ કરવા માટે આ ક્ષેત્રમાં થઈ રહેલા ઘટનાક્રમ પર નજીકથી નજર રાખી રહ્યા છીએ અને તેનું મૂલ્યાંકન કરી રહ્યા છીએ. અસરગ્રસ્ત મુસાફરોને ફ્લાઈટ રદ થવા પર સંપૂર્ણ રિફંડ આપવામાં આવી રહ્યું છે. એર ઈન્ડિયામાં, અમારા મુસાફરો અને ક્રૂની સલામતી અને સુરક્ષા સર્વોચ્ચ પ્રાથમિકતા છે,” તેમ એરલાઈને જણાવ્યું હતું.
આ ર્નિણય એરલાઈન દ્વારા અગાઉ રિયાધ આવતી-જતી ફ્લાઈટ્સ રદ કરવાની મુદત ૧૫ ઓક્ટોબર, ૨૦૨૬ સુધી લંબાવ્યા બાદ લેવામાં આવ્યો છે, જેનું કારણ ક્ષેત્રમાં બદલાતી પરિસ્થિતિને દર્શાવવામાં આવ્યું હતું.
એરલાઈન્સ દ્વારા ફ્લાઈટ્સ રદ
યમનના હુથી વિદ્રોહીઓ દ્વારા રિયાધ એરપોર્ટ પર સપ્તાહના અંતે કરવામાં આવેલા ઘાતક હુમલા બાદ વિશ્વભરની એરલાઈન્સે સાઉદી અરેબિયા અને પડોશી દેશોની ફ્લાઈટ્સ રદ કરી છે. ઈરાન સાથે યુએસ-ઈઝરાયેલ સંઘર્ષ શરૂ થયા ત્યારથી સમગ્ર ક્ષેત્રમાં જે વિક્ષેપો સર્જાયા છે તેમાં આ ઘટનાને કારણે વધુ વધારો થયો છે.
એર ફ્રાન્સ-કેએલએમ એ સાઉદી રાજધાની આવતી-જતી ફ્લાઈટ્સ સ્થગિત કરવાની તેની અગાઉની મુદત ઓક્ટોબરના અંત સુધી લંબાવી છે. રોઈટર્સના અહેવાલ મુજબ, હોંગકોંગની મુખ્ય એરલાઈન કેથે પેસિફિકે તેના હોંગકોંગ-દુબઈ અને હોંગકોંગ-રિયાધ રૂટ પર સેવાઓ ફરી શરૂ કરવાનું કામ ૩૧ જાન્યુઆરી, ૨૦૨૭ સુધી મુલતવી રાખ્યું છે.
ડેલ્ટા એર લાઈન્સે એટલાન્ટાથી રિયાધ માટેની તેની નિર્ધારિત ફ્લાઈટ્સ માર્ચ ૨૦૨૭ સુધી મોકૂફ રાખી છે.
એતિહાદ એરવેઝે અબુ ધાબી અને રિયાધ વચ્ચેની તમામ ફ્લાઈટ્સ તેમજ દમ્મામ અને જેદ્દાહ જતી ૧૦ ફ્લાઈટ્સ ૧૯ ઓક્ટોબર સુધી રદ કરી છે. બહેરીનની મુખ્ય એરલાઈન ગલ્ફ એરે ૧૨ થી ૧૭ ઓક્ટોબર દરમિયાન રિયાધ આવતી-જતી ફ્લાઈટ્સ રદ કરી છે.
લુફ્થાન્સા ગ્રુપે ૧૬ ઓક્ટોબર સુધી રિયાધ જતી તમામ ફ્લાઈટ્સ રદ કરી છે. રોઈટર્સના જણાવ્યા અનુસાર, ફિલિપાઈન એરલાઈન્સે રિયાધ આવતી-જતી ફ્લાઈટ્સ સ્થગિત કરવાની મુદત ૨૯ નવેમ્બર સુધી લંબાવી છે.
કતાર એરવેઝે રિયાધ અને દમ્મામ આવતી-જતી ફ્લાઈટ્સ કામચલાઉ ધોરણે સ્થગિત કરી છે. આકાસા એરે પણ જેદ્દાહ અને રિયાધ જતી ફ્લાઈટ્સ ૧૩ ઓક્ટોબર સુધી સ્થગિત કરી છે.