એશિયન ગેમ્સ ૨૦૨૬માં ભારતે પ્રથમ સુવર્ણ ચંદ્રક જીત્યો; ફાઇનલમાં હરમનપ્રીત કૌરની ટીમે શ્રીલંકાને હરાવી
ભારતીય મહિલા ક્રિકેટ ટીમે એશિયન ગેમ્સ ૨૦૨૬માં દેશ માટે પ્રથમ સુવર્ણ ચંદ્રક જીત્યો છે. નિશિનના કોરોગી સ્પોર્ટ્સ પાર્કમાં રમાયેલી એશિયન ગેમ્સની ક્રિકેટ ફાઇનલમાં શ્રીલંકાને ૧૪૭ રનથી હરાવીને તેમણે આ મેડલ હાંસલ કર્યો.
દિવસની શરૂઆત ઓપનિંગ જાેડી સ્મૃતિ મંધાના અને શેફાલી વર્માના શાનદાર બેટિંગ પ્રદર્શન સાથે થઈ. તેમણે ૯૯ રનની ઓપનિંગ ભાગીદારી નોંધાવી, જેમાં શેફાલીએ ૨૯ બોલમાં ૪૮ રન બનાવ્યા. તે આઉટ થયા બાદ સ્મૃતિએ જવાબદારી સંભાળી અને ૪૫ બોલમાં ૭૯ રન બનાવ્યા. ત્રીજા ક્રમે બેટિંગ કરવા આવેલી કેપ્ટન હરમનપ્રીત કૌર ખાસ પ્રભાવ પાડી શકી નહીં અને તે સમયે સ્મૃતિએ સ્કોરબોર્ડને ગતિશીલ રાખ્યું.
સ્મૃતિના આઉટ થયા બાદ રિચા ઘોષે શ્રીલંકાના બોલરોને ચોંકાવી દીધા. સિલિગુડીમાં જન્મેલી રિચાએ મેચનું ચિત્ર બદલી નાખ્યું; શ્રીલંકાએ મધ્યની ઓવરોમાં મેચ પર થોડી પકડ જમાવી હતી, પરંતુ રિચાએ સ્થિતિ બદલી નાખી. આ વિકેટકીપર-બેટરે ૨૨ બોલમાં અણનમ ૪૯ રન ફટકાર્યા, જેનાથી ભારતે પ્રથમ દાવમાં ૨૧૬ રનનો સ્કોર નોંધાવ્યો. એશિયન ગેમ્સના ઇતિહાસમાં આ અત્યાર સુધીનો સૌથી મોટો સ્કોર છે. આ દરમિયાન, સ્મૃતિએ આંતરરાષ્ટ્રીય ક્રિકેટમાં ૧૧,૦૦૦ રન પણ પૂરા કર્યા.
બીજી ઇનિંગ્સમાં ભારતીય સ્પિનરોનું વર્ચસ્વ
બેટિંગમાં શાનદાર પ્રદર્શન કર્યા બાદ, શેફાલીએ બીજી ઇનિંગ્સમાં બોલિંગમાં પણ પ્રભુત્વ જમાવ્યું. આ સ્પિનરે બે ઓવરમાં માત્ર ત્રણ રન આપીને બે વિકેટ ઝડપી, જ્યારે દીપ્તિ શર્મા અને શ્રી ચરાની પણ એટલી જ અસરકારક રહી. બંને સ્પિનરોએ ત્રણ-ત્રણ વિકેટ લીધી, જ્યારે શ્રેયંકા પાટિલે બે વિકેટ ઝડપી.
શ્રીલંકાની સમગ્ર ઇનિંગ્સનો આધાર કેપ્ટન ચમારી અથાપથ્થુ પર હતો, પરંતુ તે ફાઇનલ મુકાબલામાં સારું પ્રદર્શન કરી શકી નહીં. અનુભવી ઓલરાઉન્ડરે ૨૧ બોલમાં ૨૯ રન બનાવ્યા, ત્યારબાદ ઇનિંગ્સની સાતમી ઓવરમાં દીપ્તિએ તેને આઉટ કરી. તેના આઉટ થયા બાદ ભારત માટે મેચ જીતવી માત્ર સમયની વાત હતી અને અંતે એવું જ થયું.
વર્ષોથી, ચમારી પર શ્રીલંકાની વધુ પડતી ર્નિભરતા તેમને ભારે પડી છે અને ભારત સામેની ફાઇનલ પણ તેનાથી અલગ નહોતી. તેમના સિવાય અન્ય કોઈ પણ ખેલાડી ૨૦થી વધુ રન બનાવી શક્યું નહીં; ખાસ કરીને ૨૧૭ રનના લક્ષ્યાંકનો પીછો કરતી વખતે તેમની બેટિંગની ક્ષમતાની આ સ્થિતિ સ્પષ્ટપણે જાેવા મળી.
ભારત માટે આ ફરી એકવાર ઉત્સવની રાત છે. તેમણે ૨૦૨૨ની એશિયન ગેમ્સમાં સુવર્ણ ચંદ્રક જીત્યો હતો અને શાનદાર પ્રદર્શન સાથે તેને જાળવી રાખવામાં સફળતા મેળવી છે.