ભરૂચ જિલ્લાના જંબુસર તાલુકાના વેડચ ગામે બાળકો વરસાદી પાણી વચ્ચે ઉતરીને શાળાએ જવા માટે મજબુર બન્યા છે. જંબુસર તાલુકાના છેવાડાના વેડચ ગામે શિક્ષણની બલિહારીના દ્રશ્યો જોવા મળી રહ્યા છે. આ અંગે વહીવટી તંત્ર દ્વારા યોગ્ય કાર્યવાહી કરાય તેવી લોક માંગ કરી રહ્યા છે.
જબુંસરમાં ચોમાસાની સિઝન આવે એટલે વિદ્યાર્થીઓના લલાટે ચિંતાની લકીરો ઉપસી આવે.. કારણ કે વરસાદી પાણી વચ્ચેથી શાળાએ જવુ તો જવું કઈ રીતે…વેડચ ગામે વરસાદી પાણીનો ભરાવો થાય છે. પરંતુ તેનું કોઈ જ નિરાકરણ ન હોવાના કારણે ઘૂંટણસમા પાણીમાં બાળકો ઉતરીને શાળાએ જાય છે.
જેના કારણે તેમના યુનિફોર્મ અને ચોપડા પણ ભીંજાઈ જાય છે. આ સમસ્યા અંગે વારંવાર તંત્રમાં રજૂઆત કરવામાં આવી હોવા છતાં તેનું કોઈ જ નિરાકરણ આવ્યું નથી. આ બાબતે ગ્રામજનોના જણાવ્યા અનુસાર,દર વર્ષે વરસાદી પાણીના ભરાવાની સમસ્યા વર્ષોથી છે. તેના કારણે બાળકો સાથે ગ્રામજનો પણ મુશ્કેલીનો સામનો કરી રહ્યા છે. પરંતુ આ સમસ્યાનું કોઈ જ નિરાકરણ આવતું નથી. ગામમાં મોત થાય અથવા કોઈ બીમાર હોય તોય એમ્બ્યુલન્સ નહિ આવતા લોકો પાણીમાંથી જવા મજબૂર છે.
જ્યારે એક તરફ સરકાર વિકાસની ગુલબાંગો ફુકવામાં આવે છે પરંતુ આ ગામમાં માર્ગ બનાવવાનો તંત્રના અધિકારીઓ પાસે જાણે સમય જ નથી ત્યારે આવનારા દિવસોમાં જો તેઓના પ્રશ્નોનું નિરાકરણ નહીં આવે તો તેઓ દ્વારા ગાંધીચીંધ્યા માર્ગે આંદોલનની ચિમકી ઉચ્ચારવામાં આવી છે.