મુન્દ્રા તાલુકાના કુતડી બંદર અને ટુન્ડાવાંઢ વિસ્તારમાં છેલ્લા 100 વર્ષથી પરંપરાગત માછીમારી કરતા 650 પરિવારોએ કલેકટરને આવેદનપત્ર પાઠવ્યું છે. અદાણી પોર્ટ્સ એન્ડ SEZ લિમિટેડ દ્વારા આ માછીમારોને વારંવાર સ્થળાંતર કરવામાં આવી રહ્યા છે. પહેલા મુન્દ્રા તાલુકાના આઈસલેન્ડથી નવીનાલ કાંઈવાડી ડ્રીક અને ત્યાંથી શેખરણપીર કુતડી બંદર પર સ્થળાંતર કરાયા છે.
કંપની દ્વારા 7 વર્ષ પહેલા પીવાનું પાણી, મોબાઈલ મેડિકલ વાન, એમ્બ્યુલન્સ જેવી પાયાની સુવિધાઓ આપવાનું વચન અપાયું હતું, જે આજદિન સુધી પૂરું કરવામાં આવ્યું નથી. ઉલટાનું, માછીમારોના ઉપયોગ માટેના રસ્તાઓ 14-15 વખત તોડી નાખવામાં આવ્યા છે, જેની ફરિયાદ મુન્દ્રા પોલીસ સ્ટેશનમાં નોંધાવવામાં આવી છે.
ભોપાવાંઢ ગામથી 6-7 કિલોમીટર દૂર રહેતા આ માછીમારો છેલ્લા 40-50 વર્ષથી આ વિસ્તારમાં વસવાટ કરે છે. તેમના પર મૂકવામાં આવેલા નશીલી દવાઓના વેપાર અને અસામાજિક પ્રવૃત્તિઓના આરોપો સંપૂર્ણપણે પાયાવિહોણા છે. આ મુદ્દે સ્થાનિક આગેવાનો અને ગ્રામજનોએ પણ માછીમારોને સમર્થન આપ્યું છે. માછીમાર સમુદાય તંત્ર પાસે ન્યાયની અપેક્ષા રાખી રહ્યો છે.