ભાવનગર પેરોલ ફર્લો સ્કવોડને મળેલી બાતમીના આધારે GST છેતરપિંડી કેસમાં નાસતા-ફરતા બે આરોપીઓની ધરપકડ કરવામાં આવી છે. પોલીસે હલુરીયા ચોક વિસ્તારમાંથી આ બંને આરોપીઓને ઝડપી પાડ્યા છે.
પકડાયેલા આરોપીઓમાં નુસરતભાઇ સિકંદરભાઇ સૈયદ (ઉંમર 31) અને ઝુબેરભાઇ રસુલભાઇ સૈયદ (ઉંમર 36)નો સમાવેશ થાય છે.
બંને આરોપીઓ અમદાવાદના પાલડી વિસ્તારમાં રહે છે. નુસરતભાઇ લોટસ રેસીડેન્સીમાં અને ઝુબેરભાઇ એલીડ રેસીડેન્સીમાં રહેતા હતા. બંનેનું મૂળ વતન અમરેલી જિલ્લાના સાવરકુંડલા ખાતે આવેલું નુરાનીનગર છે.
આ બંને આરોપીઓ સામે પાલીતાણા ટાઉન પોલીસ સ્ટેશનમાં IPC કલમ 406, 420, 467, 468 અને 120 હેઠળ ગુનો નોંધાયેલો હતો.
તેઓ GST સંબંધિત બોગસ દસ્તાવેજો બનાવવાના કેસમાં સંડોવાયેલા હતા. પોલીસે બંને આરોપીઓને ગંગાજળિયા પોલીસ સ્ટેશનને સોંપ્યા છે. આ અંગે પાલીતાણા ટાઉન પોલીસ સ્ટેશનને પણ જાણ કરવામાં આવી છે.