જામનગરના પટેલ એસ્ટેટ વિસ્તારમાં એક દુર્ઘટના સામે આવી છે. 135 કેવી હાઈ ટેન્શન વીજલાઈન નજીક કામ કરતા 55 વર્ષીય અજયભાઈ નવીનભાઈ ભુવાનું મૃત્યુ થયું છે. ગત 19 એપ્રિલે અજયભાઈ કારખાનાની અગાસી પર કામ કરી રહ્યા હતા. કારખાનાના માલિકના કહેવાથી તેઓ દોરડું નાખવાનું કામ કરી રહ્યા હતા.
આ દરમિયાન તેઓ હાઈ ટેન્શન લાઈનની માત્ર 3 ફૂટની નજીક પહોંચ્યા હતા. વીજ લાઈનના ઇન્ડક્શન અથવા સ્પાર્કને કારણે તેમને પ્રચંડ વીજ કરંટ લાગ્યો હતો. તેઓ ગંભીર રીતે દાઝી ગયા અને અગાસી પરથી નીચે પડી ગયા હતા.
108 એમ્બ્યુલન્સ દ્વારા તેમને પ્રથમ જામનગરની જી.જી. હોસ્પિટલમાં લઈ જવામાં આવ્યા હતા. ત્યાંથી વધુ સારવાર માટે અમદાવાદ સિવિલ હોસ્પિટલમાં ખસેડવામાં આવ્યા હતા. 24 દિવસની સઘન સારવાર છતાં આજે સવારે તેમનું મૃત્યુ થયું છે.
આ ઘટના શહેરી વિસ્તારોમાં હાઈ ટેન્શન લાઈનો નીચે થતા ગેરકાયદે બાંધકામોની ગંભીરતા દર્શાવે છે. સ્થાનિક લોકોએ આવા જોખમી બાંધકામો સામે કડક કાર્યવાહીની માંગ કરી છે.