૧૫ એપ્રિલ સુધી નોંધણી કરી શકાશે, અત્યાર સુધીમાં ૫૨૭ ડોગની નોંધણી
ગાંધીનગર શહેરમાં વસતા પાલતુ શ્વાન પ્રેમીઓ અને માલિકો માટે મહાનગરપાલિકા દ્વારા સ્વચ્છતા અને પશુઓના વ્યવસ્થિત સંચાલન માટે શરૂ કરવામાં આવેલી પેટ ડોગ રજિસ્ટ્રેશન પ્રક્રિયાની સમય મર્યાદામાં વધારો કરવામાં આવ્યો છે. હવે શહેરના નાગરિકો આગામી ૧૫ એપ્રિલ, ૨૦૨૬ સુધી પોતાના પાલતુ શ્વાનનું સત્તાવાર રજિસ્ટ્રેશન કરાવી શકશે.
હજુ પણ અનેક માલિકોના રજિસ્ટ્રેશન બાકી
ગાંધીનગર મહાનગરપાલિકા દ્વારા શહેરમાં પાલતુ શ્વાનના રજિસ્ટ્રેશનની મુદત ૧૫ એપ્રિલ સુધી લંબાવવામાં આવી છે. અગાઉ મહાનગરપાલિકા દ્વારા આ પ્રક્રિયા માટે ૯૦ દિવસની મુદત નક્કી કરવામાં આવી હતી. આ અગાઉનો નિર્ધારિત સમયગાળો ૧૫ ડિસેમ્બર, ૨૦૨૫થી શરૂ થઈને ૧૬ માર્ચ, ૨૦૨૬ સુધીનો હતો. જાેકે, હજુ પણ અનેક માલિકો રજિસ્ટ્રેશનથી વંચિત હોવાનું જણાતા અને લોકોની સુવિધાને ધ્યાનમાં રાખીને તંત્રએ આ મુદ્દત લંબાવવાનો ર્નિણય લીધો છે. અત્યાર સુધીના આંકડાઓ મુજબ ગાંધીનગરના જાગૃત નાગરિકોએ આ ઝુંબેશમાં સારો પ્રતિસાદ આપ્યો છે અને ૫૨૭થી વધુ લોકોએ પોતાના પાલતુ શ્વાનનું સફળતાપૂર્વક રજિસ્ટ્રેશન કરાવી લીધું છે.
ફોર્મ ફરજિયાત જમા કરવાનું રહેશે
આ અંગે મનપા સૂત્રોએ જણાવ્યું કે, અરજદારો ઓનલાઈન માધ્યમથી ફોર્મ ડાઉનલોડ કરી શકશે, જેનાથી પ્રક્રિયામાં સરળતા રહેશે. જાેકે, ફોર્મ ભર્યા બાદ અરજદારે પોતે રૂબરૂ મહાનગરપાલિકાની કચેરી ખાતે જઈને જરૂરી દસ્તાવેજાે સાથે રજિસ્ટ્રેશન કરાવવાનું રહેશે. આ પ્રક્રિયા માટે કેટલાક મહત્વના પુરાવાઓ ફરજિયાત કરવામાં આવ્યા છે.
વહેલી તકે રજિસ્ટ્રેશન કરાવવા લોકોને અપીલ
જે અન્વયે અરજદારનું લેટેસ્ટ ટેક્સ બિલ, કોઈપણ એક સરકારી ઓળખપત્ર, લાઈટ બિલ અથવા ગેસ બિલનો સમાવેશ થાય છે. આ ઉપરાંત શ્વાનની સુરક્ષા અને જાહેર આરોગ્યને ધ્યાનમાં રાખીને માન્ય વેટેનરી ડોક્ટર દ્વારા આપવામાં આવેલું એન્ટીરેબીઝ વેક્સિનનું સર્ટિફિકેટ રજૂ કરવું અનિવાર્ય છે. ડોક્યુમેન્ટેશનમાં પાલતુ શ્વાનનો ફોટો, માલિકનો ફોટો તેમજ શ્વાનને રાખવાની જગ્યાનો ફોટો પણ સાથે રાખવો પડશે. મહાનગરપાલિકાએ તમામ શ્વાન માલિકોને અપીલ કરી છે કે, આ વધારાની મુદતનો લાભ લઈ વહેલી તકે રજિસ્ટ્રેશન કરાવી લેવું, જેથી ભવિષ્યમાં કોઈ કાયદાકીય મુશ્કેલી ન સર્જાય.