જામનગર શહેરમાં વિદ્યાર્થિનીઓ અને મહિલાઓની સુરક્ષાને સર્વોચ્ચ અગ્રતા આપીને પોલીસ તંત્ર દ્વારા એક વિશેષ ડ્રાઇવ શરૂ કરવામાં આવી છે. જે અંતર્ગત શહેરના અલગ-અલગ વિસ્તારોમાં કુલ 5 સ્પેશિયલ ‘શી ટીમ’ મેદાને ઉતારવામાં આવી છે. આ ટીમોએ ટ્યુશન ક્લાસીસ અને જાહેર બાગ-બગીચા તેમજ બસ સ્ટેશન સહિતના ભીડભાડવાળા સ્થળોએ લુખ્ખા તત્વો તેમજ બિનજરૂરી આંટાફેરા મારી ભય કે અસલામતીનો માહોલ ઊભો કરનારા આસામાજિક તત્વો સામે કડક કાર્યવાહી હાથ ધરી છે.
મહિલા પોલીસકર્મીઓથી સજ્જ આ 5 ટીમો દ્વારા રોમિયોગીરી કરતા તત્વોનું સઘન ચેકિંગ કરવામાં આવ્યું હતું. હાલ વેકેશનનો માહોલ હોવાથી બસ સ્ટેશન તેમજ ભીડવાળી જગ્યાઓની આસપાસ બાઈક લઈને આંટા મારતા રખડુઓને પકડીને જાહેરમાં જ કાયદાના પાઠ ભણાવવામાં આવ્યા હતા, જેનાથી આવા તત્વોમાં ફફડાટ વ્યાપી ગયો છે.
બાગ-બગીચાઓમાં અડ્ડો જમાવીને બેસતા શખ્સોની આકરી પૂછપરછ કરી તેમને તગડી મૂકવામાં આવ્યા હતા. પોલીસની આ આક્રમક ઝુંબેશને પગલે વાલીઓ, યુવતીઓએ રાહતનો શ્વાસ લીધો છે. આગામી દિવસોમાં પણ આ સરપ્રાઈઝ ચેકિંગ અને કડક કાર્યવાહી સતત ચાલુ રાખવામાં આવશે.