સુરત મહાનગરપાલિકાના સેન્ટ્રલ ઝોન વિસ્તારમાં આવેલા નાસીરનગર ખાતે તાજેતરમાં હાથ ધરવામાં આવેલા ડિમોલિશન મામલે એક ખુબ જ મોટા સમાચાર સામે આવી રહ્યા છે. ગુજરાત હાઈકોર્ટ દ્વારા આ મામલે આકરૂ વલણ અપનાવી સુરત મહાનગરપાલિકાના તંત્રને જોરદાર ફટકાર લગાવવામાં આવી હતી.
હાઈકોર્ટની આ કડક ટીપ્પણી બાદ આખરે ઊંઘતું ઝડપાયેલું પાલિકા પ્રશાસન તાત્કાલિક ધોરણે હરકતમાં આવ્યું છે. તંત્ર દ્વારા માનવતાવાદી અભિગમ દાખવીને ડિમોલિશનના કારણે ઘરવિહોણા બનેલા અસરગ્રસ્ત પરિવારો માટે વૈકલ્પિક અને હંગામી વસવાટની વ્યવસ્થા કરવાનો મહત્વનો હુકમ જાહેર કરવામાં આવ્યો છે.
કોર્ટની ફટકાર બાદ કોર્પોરેશનની અધિકારીઓ દોડતાં થયાં નાસીરનગર ડિમોલિશનની આ સમગ્ર ઘટના બાદ અસરગ્રસ્તો ખુલ્લા આકાશ નીચે આવી ગયા હતા, જેને પગલે મામલો હાઈકોર્ટ સુધી પહોંચ્યો હતો. કોર્ટની ફટકાર પડતાની સાથે જ સુરત મહાનગરપાલિકાના સેન્ટ્રલ ઝોનના ઇન્ચાર્જ આસિસ્ટન્ટ મ્યુનિસિપલ કમિશનર ડી.ડી. પટેલે મોરચો સંભાળ્યો હતો.
તેમણે એક સત્તાવાર હુકમ બહાર પાડીને જણાવ્યું છે કે, ડિમોલિશન પ્રક્રિયાથી પ્રભાવિત થયેલા તમામ નાગરિકોને તાકીદે વૈકલ્પિક વ્યવસ્થા પૂરી પાડવામાં આવે. કોઈપણ પરિવાર આકરી ગરમી કે મુશ્કેલ પરિસ્થિતિમાં આશ્રય વગર ન રહેવો જોઈએ તે બાબતને પ્રાથમિકતા આપવામાં આવી છે.
ભરીમાતા કોમ્યુનિટી હોલ બનશે હંગામી આશ્રયસ્થાન પાલિકાના આદેશ અનુસાર, નાસીરનગર ડિમોલિશનના તમામ અસરગ્રસ્તોને તાત્કાલિક ધોરણે વસવાટ આપવા માટે સુરતના ભરીમાતા કોમ્યુનિટી હોલની પસંદગી કરવામાં આવી છે.
આ હોલ ખાતે તમામ પીડિત પરિવારો માટે હંગામી ધોરણે રહેવા તેમજ ખાવા-પીવાની વ્યવસ્થા સુનિશ્ચિત કરવા માટેની કવાયત્ શરૂ કરી દેવામાં આવી છે. અધિકારીઓ દ્વારા તાકીદની સૂચના આપવામાં આવી છે કે ડિમોલિશન સાઇટ પરથી લોકોને સુરક્ષિત અને સન્માનજનક રીતે આ કોમ્યુનિટી હોલમાં શિફ્ટ કરવામાં આવે.