મહારાષ્ટ્રના શિક્ષણ મંત્રી દાદા ભૂસેએ જાહેરાત કરી હતી કે, સમગ્ર રાજ્યની તમામ માધ્યમોની શાળાઓમાં ધોરણ ૧ થી ૧૦ સુધી મરાઠી ભાષા ફરજિયાત બનાવવામાં આવી છે. રાજ્યના તમામ માધ્યમોની અને તમામ શિક્ષણ બોર્ડ સાથે જાેડાયેલી શાળાઓને આ સંદર્ભમાં જરૂરી સૂચનાઓ આપવામાં આવી છે.
આ નિયમના અસરકારક અમલીકરણની ખાતરી કરવા માટે એક ખાસ નિરીક્ષણ અભિયાન હાથ ધરવામાં આવશે અને નિયમનું ઉલ્લંઘન કરવા બદલ કડક કાર્યવાહી કરવામાં આવશે. શાળાઓને એવા લાયક શિક્ષકોની નિમણૂક કરવાની પણ સૂચના આપવામાં આવી છે જે મરાઠી ભાષા શીખવવા માટે સક્ષમ હોય.
ભૂસેએ ચાલુ ચોમાસુ સત્રમાં ચર્ચા દરમિયાન મહારાષ્ટ્ર વિધાનસભામાં આ માહિતી આપી હતી.
આ મુદ્દો શા માટે ઉઠાવવામાં આવ્યો?
હકીકતમાં, ભાજપના ધારાસભ્ય અતુલ ભટખલકરે વિધાનસભામાં એક પ્રશ્ન દ્વારા આ મુદ્દો ઉઠાવ્યો હતો. ચર્ચા દરમિયાન, અન્ય ધારાસભ્યોએ પણ પૂરક પ્રશ્નો પૂછ્યા. સભ્યોએ આરોપ લગાવ્યો હતો કે રાજ્યભરની ઘણી શાળાઓમાં મરાઠી ભાષા શીખવવામાં આવી રહી નથી.
તેઓએ જણાવ્યું હતું કે આવી શાળાઓ પર લાદવામાં આવેલ દંડ અપૂરતો છે અને નિયમોનું ઉલ્લંઘન કરનારાઓ સામે અસરકારક કાર્યવાહી કરવામાં આવી રહી નથી.
ભૂસે કહે છે કે, બધી શાળાઓનું નિરીક્ષણ કરવામાં આવશે
વિધાનસભામાં આ મુદ્દા પર જવાબ આપતા ભૂસે જણાવ્યું હતું કે સરકાર મરાઠી ભાષાના સંરક્ષણ અને સંવર્ધન માટે સંપૂર્ણપણે પ્રતિબદ્ધ છે.
તેમણે જાહેરાત કરી હતી કે બધી શાળાઓનું નિરીક્ષણ કરવા માટે એક ખાસ રાજ્યવ્યાપી ઝુંબેશ શરૂ કરવામાં આવશે, અને જાે નિયમોનું ઉલ્લંઘન જાેવા મળશે તો સંબંધિત અધિકારીઓ સામે કડક કાર્યવાહી કરવામાં આવશે.
છત્રપતિ શિવાજી મહારાજ અંગે પણ ચર્ચા થઈ હતી
આ સમય દરમિયાન, ભૂસેએ છત્રપતિ શિવાજી મહારાજના ઇતિહાસ અંગે પણ મહત્વપૂર્ણ માહિતી શેર કરી હતી. તેમણે નોંધ્યું હતું કે, જ્યારે છત્રપતિ શિવાજી મહારાજનો ઇતિહાસ અગાઉ દેશભરના અન્ય શિક્ષણ બોર્ડના પાઠ્યપુસ્તકોમાં ફક્ત દોઢ કોલમ સુધી મર્યાદિત હતો, પરંતુ કેન્દ્ર સરકારની મંજૂરી બાદ હવે તેને ૨૨ પાના સુધી વિસ્તૃત કરવામાં આવ્યો છે.
તેમણે જણાવ્યું હતું કે રાજ્ય સરકાર મરાઠી ભાષાને મજબૂત બનાવવા અને છત્રપતિ શિવાજી મહારાજના ગૌરવશાળી ઇતિહાસને નવી પેઢી સુધી વ્યાપકપણે પ્રસારિત કરવા માટે પ્રતિબદ્ધ છે.
સરકાર ખાતરી કરશે કે બધી શાળાઓ નિર્ધારિત નિયમોનું પાલન કરે, અને કોઈપણ સ્તરે કોઈ બેદરકારી સહન કરવામાં આવશે નહીં.