ગણેશ ચતુર્થીના પવિત્ર દિવસે પ્રથમ જ્યોતિર્લિંગ સોમનાથ મહાદેવ મંદિરમાં એક અનોખો નજારો જોવા મળ્યો હતો. સવારે આરતી પહેલા પૂજારીઓએ સોમનાથ મહાદેવને ભગવાન ગણેશજીનું સ્વરૂપ ધારણ કરાવતો ખાસ શૃંગાર કર્યો હતો. શિવ અને ગણેશજીના આ શુભ સમન્વયના દર્શનથી સોમનાથ ધામમાં ભક્તિનો માહોલ છવાઈ ગયો હતો.
ગણેશ ચતુર્થી નિમિત્તે સોમનાથ મહાદેવના શિવલિંગ પર પૂજારીઓએ ખાસ શૃંગાર કર્યો હતો. શિવલિંગને લીલા પર્ણો, અલગ અલગ ફૂલો અને ભસ્મ જેવી પૂજાની સામગ્રીથી સજાવવામાં આવ્યું હતું. આ સામગ્રીનો ઉપયોગ કરીને શિવલિંગ પર ભગવાન ગણેશજીની સુંદર પ્રતિકૃતિ બનાવવામાં આવી હતી. સોમનાથ મહાદેવના આ ગણેશ સ્વરૂપના દર્શન ભક્તો માટે એક આધ્યાત્મિક અનુભવ સમાન હતા.
વહેલી સવારથી જ સોમનાથ મંદિર પરિસરમાં ભક્તિનો માહોલ હતો. સવારની આરતી પહેલા કરાયેલા આ ખાસ ગણેશજી શૃંગારના દર્શન માટે ભક્તોમાં ખૂબ ઉત્સાહ જોવા મળ્યો. આરતી દરમિયાન ઘંટનાદ, મંત્રોચ્ચાર અને જયઘોષ વચ્ચે ભગવાન સોમનાથ મહાદેવના ગણેશ સ્વરૂપના દર્શન કરીને ભક્તો ભાવવિભોર બન્યા હતા.
હિંદુ પરંપરામાં ભગવાન ગણેશને વિઘ્નહર્તા અને મંગલમૂર્તિ તરીકે પૂજવામાં આવે છે. જ્યારે સોમનાથ મહાદેવ શૈવ પરંપરાના મુખ્ય દેવ છે. ગણેશ ચતુર્થીના પવિત્ર દિવસે સોમનાથ મહાદેવના શિવલિંગ પર ગણેશજીની પ્રતિકૃતિનો આ ખાસ શૃંગાર બંને દિવ્ય સ્વરૂપોના આધ્યાત્મિક સમન્વયનો સુંદર સંદેશ આપી રહ્યો હતો.