હરિયાણામાં ઔદ્યોગિક વિકાસને નવી ગતિ આપવા અને રાજ્યને દેશના અગ્રણી રોકાણ સ્થળ તરીકે સ્થાપિત કરવાના ભાગરૂપે ગુજરાત પ્રવાસના પ્રથમ દિવસે સુરત ખાતે વિવિધ અગ્રણી કંપનીઓ સાથે આશરે ₹12,000 કરોડના રોકાણના સમજૂતી કરાર (MoUs) પર હસ્તાક્ષર કરવામાં આવ્યા છે. હરિયાણાના મુખ્યમંત્રી નાયબ સિંહ સૈનીની સીધી ઉપસ્થિતિમાં સંપન્ન થયેલા આ મહત્વપૂર્ણ MoUs હરિયાણામાં ઔદ્યોગિક પ્રવૃત્તિઓના વિસ્તરણ, ઉદ્યોગ જગતના વિશ્વાસ અને રાજ્ય સરકારના રોકાણ પ્રોત્સાહન પ્રયાસોને એક નવી દિશા અને મજબૂતી આપશે.
ડિફેન્સ ટેક્સટાઈલ અને વેસ્ટ-ટુ-એનર્જી સહિત વિવિધ ક્ષેત્રોમાં જંગી કરાર સુરત ખાતે થયેલા આ કરારોમાં વ્યૂહાત્મક અને ઉત્પાદન ક્ષેત્રોને મોટું સ્થાન આપવામાં આવ્યું છે. આ અંતર્ગત સૌથી વધુ ડિફેન્સ ટેક્સટાઈલ ક્ષેત્રે ₹5,000 કરોડ અને વેસ્ટ-ટુ-એનર્જી ક્ષેત્રે ₹4,000 કરોડના કરાર થયા છે. આ ઉપરાંત ટેક્નિકલ ટેક્સટાઈલ ક્ષેત્રે ₹2,000 કરોડ, ઔદ્યોગિક મશીનરી ક્ષેત્રે ₹500 કરોડ તેમજ સૌર ઊર્જા અને કોસ્મેટિક ઉત્પાદન ક્ષેત્રે ₹400 કરોડના રોકાણ પ્રસ્તાવો પર સહમતિ બની છે, જેનાથી રાજ્યના ઔદ્યોગિક માળખાને મોટો લાભ મળશે.
વન-ટુ-વન બેઠકોમાં સરળ નીતિઓ અને રોજગાર સર્જન પર ભાર મૂકાયો મુખ્યમંત્રી નાયબ સિંહ સૈનીના નેતૃત્વમાં આવેલા પ્રતિનિધિમંડળે કંપનીઓના ફાઉન્ડર્સ, MDs અને CEOs સાથે વન-ટુ-વન બેઠકો યોજી હતી. ઉદ્યોગ અને વાણિજ્ય મંત્રી રાવ નરબીર સિંહની હાજરીમાં થયેલી આ ચર્ચામાં સિંગલ વિન્ડો સિસ્ટમ, પ્લગ-એન્ડ-પ્લે સુવિધાઓ અને ઈઝ ઓફ ડૂઇંગ બિઝનેસ અંગે વિસ્તારપૂર્વક વાતચીત થઈ હતી. મુખ્યમંત્રીએ જણાવ્યું હતું કે, રોકાણકારોને નિયમ મુજબ તમામ પ્રોત્સાહનો અને ઝડપી મંજૂરીઓ આપી યુવાનો માટે રોજગારીની નવી તકો ઊભી કરવી એ સરકારનું પ્રાથમિક લક્ષ્ય છે.