નવીદિલ્હી
સરકાર દ્વારા બહાર પાડવામાં આવેલ ડેટા દર્શાવે છે કે રસીનો બીજાે ડોઝ મેળવવા માટે પાત્ર ૨૦,૯૯૮ કિશોરો પૈકી ૪,૫૭૬ રસી માટે પહોંચી ગયા હતા. દિલ્હી સરકારના અધિકારીઓએ જણાવ્યું હતું કે મંગળવારે અન્ય ૩૩,૧૭૯ બાળકો તેમના બીજા ડોઝ માટે પાત્ર બનશે. આ વર્ષે ૩ જાન્યુઆરીથી કેન્દ્ર સરકારે ૧૫-૧૮ વર્ષની વયના બાળકો માટે કોવિડ-૧૯ રસીકરણ કાર્યક્રમ શરૂ કર્યો હતો. ઉત્તર-પૂર્વ દિલ્હીએ સોમવારે સવારે ૯ થી સાંજના ૬ વાગ્યાની વચ્ચે ૧,૨૮૨ બાળકોને રસી આપવામાં આવી છે. જે શહેરના ૧૧ જિલ્લાઓમાં સૌથી વધુ છે. આ પછી દક્ષિણ-પશ્ચિમ જિલ્લામાં ૬૨૪ ડોઝ આપવામાં આવ્યા છે. આ સિવાય મધ્ય દિલ્હીમાં ૧૨૯, પૂર્વ દિલ્હીમાં ૪૦૦, નવી દિલ્હીમાં ૩૭૯, ઉત્તર દિલ્હીમાં ૧૧૮, ઉત્તર-પશ્ચિમ દિલ્હીમાં ૩૮૧ અને શાહદરામાં ૩૩૭ બાળકોને બીજાે ડોઝ આપવામાં આવ્યો હતો. બાળકોને હાલમાં કોવેક્સિનના શોટ આપવામાં આવી રહ્યા છે, જે બે ડોઝના છે. “૧૫ થી ૧૭ વર્ષની વયજૂથના બાળકોના રસીકરણની ગતિ ઝડપી હોવાથી અમે હવે એ સુનિશ્ચિત કરી રહ્યા છીએ કે જે બાળકોને હજુ સુધી તેમનો પ્રથમ ડોઝ મળ્યો નથી તેઓને વહેલામાં વહેલી તકે આવરી લેવામાં આવે. અમે એવા બાળકો પર પણ ધ્યાન કેન્દ્રિત કરી રહ્યા છીએ જેઓ આ અઠવાડિયાથી બીજા ડોઝ માટે પાત્ર બનશે. નોંધપાત્ર રીતે, ૩ થી ૯ જાન્યુઆરીની વચ્ચે, ૧૫ થી ૧૭ વર્ષની વય જૂથના ૨.૫ લાખથી વધુ બાળકોને પ્રથમ ડોઝ આપવામાં આવ્યો હતો.
